فى سِركِنا المكشوف
ـــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــــ
قـرّب قـرّب وتعالَ ادخـل سـركنا المكشوف
فـى السّـاحه تعالَ اتفـرّج تعـالَ بُص وشوف
ــــــــــــــــــــــــــــــــــــــــــــــــــــــــــــــــــــ
رقص على صجات وزمامير وطبل ودفوف
والبرابر عمّاله تصيح والدّيـك ريشه منتوف
ــــــــــــــــــــــــــــــــــــــــــــــــــــــــــــــــــــ
والـدّيـب موِّت مِعزه صُغيّره وأكـل الخروف
والضّبع علـى أكـل فريسته قبل قتلها ملهوف
ــــــــــــــــــــــــــــــــــــــــــــــــــــــــــــــــــــ
والبلطجى رافع على النّاس مطاوى وسيوف
وكلام مجانين بيجلجل وكلام العقلاءمحذوف
ــــــــــــــــــــــــــــــــــــــــــــــــــــــــــــــــــــ
وباشا لابس مستورد وَقّع عليه كِبير معروف
وواحـد مِـن هدومه المهلهله خجلان مكسوف
ـــــــــــــــــــــــــــــــــــــــــــــــــــــــــــــــــــــ
واحد فـى الشّتا عِريان ومش لاقى مصروف
وواحـد جيوبـه بالفلوس مليانه وبدلته صوف
ـــــــــــــــــــــــــــــــــــــــــــــــــــــــــــــــــــــ
ومشهـور الأيـادى مرفوعاله بالتّحيه صفوف
والتّانى هِـىّ نفس الأيـادى نزله عليه بكفوف
ــــــــــــــــــــــــــــــــــــــــــــــــــــــــــــــــــــ
إزّاى يِجِى كده فـرج ومنين تِتْحسّـن ظروف
فــى بلـد فيهـا الحـقُّ ضايع والعـدل منسوف
ــــــــــــــــــــــــــــــــــــــــــــــــــــــــــــــــــــ
( عاميّه )بقلم ..د/ محمد حسن مصطفى شتا
بار الحمّام بسيون غربيه
ليست هناك تعليقات:
إرسال تعليق