بنت الجيران
الطيبه
القلب الأبيض
اللي مليان بالحنان
إللي لما بشوفها
عقلي يتوه
يجيلي جنان
أو لما اشوف الضحكه
بعنيها
ببقي حاسس روحي
فيها
كنت شايف نفسي ليها
فارس الفرسان
كنت طايش
ليها هامش
وإن كل الحب ليها
كان مجرد وهم عشته
او تقول غرام
صبيان
حبَ يوم
بنت الحيران
🔹🔹🔹🔹
أصل الحكايه
من البدايه
كنت واد شاعر
رومانسي
وحبُها كان جوه
نفسي
كنت بكتب شعري
ليها
وانا في الغرام ولهان
تقدر تقول فرحان
أصل طول الوقت أشوفها
بالشباك
كنت بطنطط ونفسي
أكون هناك
ماكنتش اعرف إن في
واحد هناك
علي أول الشارع
بتحب فيه
بنت الجيران
منكرش إني
إنصدمت
أو تقول أني
إتخنقت
رغم البراح
حسيت جراح
وحبست نفسي بين
أربع حيطان
وإن السبب
بنت الجيران
🔹🔹🔹🔹
كان يمر الوقت أحس
بألم ميئوس
كنت حاسس إنه حلم
أو بجد يكون كابوس
قلبي كان ضايع حزين
من وقتها
طب مين يقولي أشكي
مين من حبها
ولا ليا خاطر أو معزه
عندها
ولا حتي في الحسبان
ولا حد يعرف إن لسه
بحبها
وإن اسمها بنت الجيران
🔹🔹🔹🔹
الصدمه كانت وجع
إحساس يحير
ماانا كنت عيل وقتها
وكمان صغير
كنت لازم أشد حيلي
واقف
مين اللي حب ومره واحده
اتنصف
مهو كل شيء عني لو أتعرف
كان قالو إيه مالك
ياواد خيبان
فكرت ياما في حبها
واتكتمت
وانا لما صدفه شوفتها
إبتسمت
عدا الزمن من بعدها
وإنشغلت
ووقت فرحها بزفها
ماانا اتعزمت
كبرت وشوفت انا بنتها
وانبسط
لكني لسه بعزها
ومنها انحرمت
واديني محروم منها
طول الزمان
ولا حد يعرف سرها
ولا إني حبيت
بنت الجيران
🔹🔹🔹🔹
أحمد طلبه
٢٠١٧/١١/٢٢
ليست هناك تعليقات:
إرسال تعليق