أنا مين قولولي ؟
نفسي ياناس أعرف أنا مين
ردوا عليا يامستمعين
أنا بيرم ولا أنا حيرم
ولا أنا أبقا غراب البين
لو بيرم فين سميعتي
وفين لميعتي وفين قرّائي
لو حيرم طب فين قرشي
وطب فين كرشي وفين أشيائي
نفسي ياناس أعرف أنا مين
ردوا عليا يامستمعين
أنا خايب الرجا ولا أنا متعوس
ولا أنا زي ماقالوا منحوس
ولا أنا فارس بني خيبان
راكب فرس إبن الفرطوس
نفسي ياناس أعرف أنا مين
ردوا عليا يامستمعين
دنيتي ليه بتلطش فيا
وليه بيرازي فيا المرازية
برغم إن أنا ماشي جنب الحيط
ألاقي الحيط بيحط عليا
نفسي ياناس أعرف أنا مين
ردوا عليا يامستمعين
أنا إيه أنا ليه أنا مين أنا فين
أنا طارق السيد أفندي حسين
أنا مش عنتر أبو الفرسان
ولا سي إسكندر ذو القرنين
ولا باتمان ولا سوبرمان
ولا إبن المنذر أبو النعمان
ولا طرزان أنا في الأدغال
ولا واد جان أنا ولا أغاخان
أنا ياخوانا واحد م الناس
لاأنا مزاجنجي وصاحب كاس
ولا بتكلين ولا بتغندر
ولا متصابي ولا هلاس
بيقولوا عليا إن أنا بفا واد
واد إنما كدا حتة واد
زجال قوال وخليفة نجم
وعمنا بيرم والحداد
وأنا على قدي قوي وغلبان
لاقد فلان أنا ولا علان
أنا غلبان وأغلب م الغلب
ولا أبقا خليفة ولابتنجان
عرفتوا أنا مين يامستمعين
أنا طارق السيد أفندي حسين
ناس بتقول أنا صورة جميلة
بس ياعيني قليل الحيلة
وناس بتقول إن أنا شمشون
جابت داغي الست دليلة
وناس بتقول ملك العامية
وناس بتقول إن أنا أسطورة
ياللي ما دارين باللي ما بيا
البرواز حابس في الصورة
بقلم طارق السيد
ليست هناك تعليقات:
إرسال تعليق