صرخة جاهل
جرى فيكي يادنيا إللي مايجراشي
بقى يسوى خلاص إللي مايسواشي
بلطجي م الفوضى إتحكم فيا
صبح وليل يلعن أبو خاشي
أعض شفايفي وأجز سناني
وأفرك عيني وأسد وداني
وفكري يروح ويجيب ويودي
أشد في شعري وأقول أه ياني
أه ياني يادنيا يابنت الإيه
خليتي يادنيا البلطجي بيه
وأنا اللي كنت عزيز الأهل
بقيت دلوقت مابسوى جنيه
أه ياني ياكسرة نفسي وذلي
بقيت أتدارى ياناس ورا ضلي
راحت الأيام الحلوة
مبقاش غير الهم فاضلي
نفسي السعد يجيني لو مرة
نفسي أدوق غير طعم المرة
نفسي عنيا تنام مرتاحة
بدل ماهي دايما طالعة لبرة
كفاية يادنيا وكفي إيديكي
أبوس في إيدن ودماغ معاليكي
كفاية يادنيا تمرمطي فيا
وتدهوسي فيا برجليكي
وفجأة بدون سابق إنذار
وفي عز مادمي مولع نار
ومش شايف غير بس سواد
وبدق في نعشي أخر مسمار
جاتني الرحمة من الرحمن
في صورة طيف قاللي ياإنسان
البلا مكتوب على كل الناس
والصابر هو الكسبان
قمت إتوضيت دوغري وصليت
وبكيت ودعيت سامحني يارب
سامحني ياربي يارب الناس
سامحني يارب أنا توبت خلاص
بقلم طارق السيد
ليست هناك تعليقات:
إرسال تعليق