نفسي
كاره نفسي ياخلق ونفسي
أشوف بعنيا بصيص من نور
مش شايف بس أنا غير الضلمة
ومر الكلمة و سد وسور
زي الثور مربوط في الساقية
مغمض عيني بلف وأدور
عاشان بس شوية مية
يتطرطشوا على أرضي البور
على طول راكباني يادنيا وسايقة
ليه شايفاني يادنيا حمار
على طول قرفانة مني ومتضايقة
كأن مابيني وبينك تار
كفاية دق على دماغي يادنيا
زي شاكوش وأنا المسمار
لو راكبك جن يادنيا قوليلي
وندر عليا أعملك زار
معلش ياناس تقلت عليكو
تقلت عليكو من عشمي أنا فيكو
فضفضت شوية أحسن ماأتجنن
آسف لو نكدت عليكو
يارب ياخالق كل الكون
يارب يا آمر كن فيكون
سامحني يارب على فضفضتي
راضي بأمرك مهما يكون
يارب العزة بإيدك خيرك
يارب ماليش في الدنيا دي غيرك
سامحني لأني ضعفت يارب
يارازق الدودة ورازق طيرك
بقلم طارق السيد
ليست هناك تعليقات:
إرسال تعليق