( ريحة رمضان )
...................
ريحة رمضان ماسابتش مكان إلا وملتها ببركتها
كلها أيام ونصوم يا سلام ونشوف الدنيا وحلاوتها
تيجى لولاد ولا بينها معاد وتقول وحوى قدام بيتها
وحاجات مطبوعه ف الذكرى مهما كبرت انا مانستها.........................................
ييجى عمى خميس يدينا فوانيس وف ايده السبحه بيضا طويله
واولادنا تهيص يلعبوا خلاويص يتلموا كده ف صحبه جميله
وكنافه و ياميش ومعاها نعيش احلى الاوقات ويه العيله
دورات رمضان نلعبها كمان تحت الاضواء تلاتين ليله
وصلاة تراويح لها طعم صحيح نسعى ف الخير ونقول هيلا
................................................
واصحاب بالود بنعزمها واللقمه ما بينا بنقسمها الله يا سلام
وموائد رحمن عاملينها والناس مش ناسيه وفاكرينها ودى عايزه كلام !!
ويلح وعصاير الوان ومحمد رفعت فى ادان وصلة ارحام
وقطايف محشيه زبيب عن بالى انا ابدا ما تغيب ولا ف الاحلام
وقرايه ف مصحف ويوماتى دايما دى بتسعد اوقاتى وبعوده الأيام
.................................................
وعيال ف سحور مع طبله تدور ومسحراتيه سهرانه
بعد القران مغرب واذان نحمد ربنا على ماادانا
ونفك صيامنا مع الفرحه ويا سيدى على الدعوات طارحه قولوا معانا
يارب تبارك ايامنا اقبلها صلاتنا وصيامنا ولا تنسانا
بس انا عشمان فى اللى زعلان من حد يصالحه ودى امانه
ليست هناك تعليقات:
إرسال تعليق