بِنضْحَكْ
*********
رَغْم اِلفَقر ورَغْم اِلجُوع
بِلِبسْ مِقَطَّع أو مَرقُوع
مهما حَياتنا تِقلِب لِيل
ناس قَايدَلنَا إيدها شُمُوع
عَوِّد قَلبَك دايما" يِضْحَكْ
سِيبَكْ مِ اِللِّي يِقلِق رَاحْتَك
اُوعَ تنام فِ يُوم مَوجوع
لِيه مَقمُوص بِتِنْدِب حَظَّك؟
دا مَهمَا يكون...اُشكُر رَبَّكْ
لِيه تِقضِيهَا ألم وِدمُوع؟
بُصْ لجِسْمَكْ فيه كَام نِعمَه؟
وسَترُه عَلِيك لِيه كَام مَعنَى !
بَلاش تِتلَوَّى طُول الاسبُوع
مَالُه اِلمَلح ومَالُه اِلعِيش؟!
لُقمَه تاكُلهَا أكِيد هَتعِيش
مَحَدِّش مَاتْ أبدا" مِ الجُوع
اُوعَ تِبُص فِ يُوم لِلغِير
تِنهَب تِسرَق فَاكرُه دَا خِير
عَوِّد اِبنَك يِبقَى قَنُوع
اِضْحَكْ يَلَّا اِفرِد وِشَّكْ
خَلِّي اِلحُزن يِطِير مِنْ عِشَّكْ
دَا عُمْر اِلحُزن مَ كَانْ مَشْرُوع
******************
زكريا ضاحي توفيق
من ديوان { تخاريف }
ليست هناك تعليقات:
إرسال تعليق