(سلف ودين )
والكلام اللي في عينيكي
كان بيحكي حاجات كتير
عن سنين الغدر بيكي
وانتي كان عندك ضمير
والدموع كانت بتنزل
ع الخدود تكتب حوار
دمع عينك كان بيغزل
م الألم شجرة مرار
كنت واقف بس باحلم
ان تطلع ضحكة منك
بس برضوا الله أعلم
فيكي ايه كان غصب عنك
كنت باحكي في نكتة حلوة
كنت باحلم بس إنك
تبقي جنبي في كل غنوة
وألقي صورتي في قلب ننك
بس كله كان فشوش
كل دمعة حزن فيكي
كات بتظهر ع الوشوش
عملوا ايه الكفرة فيكي ؟
دول أكيد ما بيرحموش
واما دوبت وصبري طال
كات اجابتك ع السؤال
كنتي أجمل واحدة عاشقة
بس عشقك كان محال
الجراح لو جات في واحدة
تتقتل فيها الآمال
فاوعي تجرح اي واحدة
وتاني تحلم بالوصال
وفي النهاية القلب قال
الحياة مش جاه ومال
والحب مش جسم وجمال
الحياة ألف احتمال
كل يوم تصبح بحال
لو هتجرح حد فكر
مهما جرحك كان تلال
جرح قلبك هيكون أكبر
جرح أكبر م الجبال
ليست هناك تعليقات:
إرسال تعليق