إهداء إلى أخي الحبيب شهيد الواجب 23/1/2016
فراقك صعب
فراقك صعب عليا
يا أغلي من نور عينيا
ياخويا وصاحبي وحبيبي
ياروح وساكنه فيا
ياقلب طيب حنين
ويد كانت سخية
فراقك صعب
أنا فاكرك مش ناسيك
ولا ناسي حبي ليك
ولا ناسي ضحكتك
أنا فاكر لون عنيك
والطيبه اللي جوه فيك
وزهدك في دنيتك
أنا فاكر دلعي فيك
وهزاري لما اناديك
في وقت كان أخرتك
عشت تخدم ف ناسك
والخير ده كان أساسك
ومصر جوه راسك
وزي ما قال إحساسك
أنا رايح ومش راجع
صنعت لنفسك طابع
تالت وبعده رابع
وزنادك ماسكه صابع
وفراقك لينا واجع
فراقك صعب
رنه وراها إتصال
سياره فوق الرمال
جندي ومات في الحال
بعد الشهادة ما قال
ومش محتاجة سؤال
أخويا يا ناس شهيد
سلاحه كان كل همه
ميت غرقان فى دمه
وف جيبه رساله لأمه
كان بيحكي فيها همه
و نفسه يكون شهيد
خبر وكان عاجل عاجل
ومفيش وراه آجل
جندي وكان راجل
ورسالة حمام زاجل
مكتوب فيها شهيد
تاني يوم الصبح بدري
داخل وطالع أجري
والبيت كله حزين
كراسي ع الأرض تنزل
من فوق ولتحت أنزل
وأرص ع الجانبين
دقات القلب زادت
ودموعي راحت وعادت
وسالت علي الخدين
نفس اليوم الساعة ٢
من يناير أربعه وعشرين
سنة، ١٦ فوق ٢٠٠٠
أهل القرية متجمعين
وف كل حته منتظرين
اللي واقف واللي قاعد
شمال ويمين
واللي جاي لسه يسأل
هوا فين
مش مصدق إنه مات
وف لحظة كان كله حزين
دلوقتى شايف زكريات
وصاحبه جي له شهيد
في جنازة عسكرية
ويوم كيوم النصر
أخويا جاي عليا
ملفوف بعلم مصر
أنا شيلته بين إيديه
ع المغرب بعد العصر
ويارب هون عليا
إبنيله ف الجنة قصر
واغفر لأبوه وليا
وارحم أم الشهيد
أخويا شهيد ومش هبكي
ولو بكيت هكون غلطان
أنا هفرح ومش هشكي
والشكوى بس للرحمن
افرح ياخويا لأنك شهيد
في الشهادة مكنتش وحيد
رحت لصاحبك ملقتهوش
كان قريب مش بعيد
لما قلت مبتشفهوش
صدفة جت زي البريد
وحش كان ويا الوحوش
واختار معاك يكون شهيد
إفرح ياخويا لأنك شهيد
ويوم وفاتك ليك ده عيد
إفرح لأنك عند المجيد
وبرؤيته هتكون سعيد
وأنا عارف إني ف مكان
وانت ف مكان تاني
وف يوم هجيلك ياحبيبي
وكل شيء فاني
روحك بإذن الله
ياخويا ف الجنه
بجوار رسول الله
تفرح وتتهنى
وتفوز بحور العين
ومعاها تتحني
فوق العدد سبعين
تتزف في الجنه
شكر وتقدير للأستاذه شاهي أحمد على تعاونها الجميل في نشر كلماتي عن الشهيد سليمان البدراوي شهيد الواجب وإبن المحلة الكبرى رحمه الله وغفر له وأدخله فسيح جناته
ردحذفتحياتي أستاذه شاهي أحمد
تحياتي للأساتذة المساهمون
ردحذفأستاذ على علي
أستاذه نورا سليم
أستاذه شاهندا محمود
أستاذه شويكار محمود
وشكر خاص لمجلة الإبداع للشعر والأدب