ياعيني ياكتافي
ياعيني ياكتافي صعبانة عليا
شيلتي حمول ماتشيلها جبال
صعبانة عليا ومش بإديا
أخفف عنك الأحمال
يادنيا كفاية حملتي عليا
لحد عضم كتافي مابان
ليه تحبي تملي تدوسي عليا
ولا عشان قالوا في الأمثال
إن الدنيا دي مش وردية
الإسود فيها ملك الألوان
حتى نيابك لما بتغرز
بس بتغرز في الغلبان
يادنيا كفاية أبوس في إيديكي
إمتى يادنيا هترضي عليا
أطلبي من عيني يادنيا أدييكي
وأفرد ضهري يادنيا شوية
إللي حناه أحمال معاليكي
ردت فجأة الدنيا عليا
قالتلي ياجاهل أنا مش ضدك
إلا بإذن الله الرحمن
إنت اللي نسيت تذكر ربك
خدك الضنك بالأحضان
خدها نصيحة إستغفر ربك
صلي و زكي إقرا القرآن
ساعتها أطلب من ربي مابدك
يمن عليك ربي المنان
بقلم طارق السيد
ليست هناك تعليقات:
إرسال تعليق