مشروع أغنية شعبية، بعنوان " يا لمخاصمني بلا اسباب ومخليني في لعذاب " تمنيت أن يلحنها و يغنيها الفنان الشعبي مصطفى أومكيل أو أي فنان آخر له نفس طويل، على إيقاع وتري أمازيغي.
يا لمخاصمني بلا اسباب ومخليني في لعذاب
--- 0 - 0 ---
يا لمخاصمني بلا اسباب ومخليني في لعذاب
ونسيتي اليوم باللي كنا زمان خوت وحباب
هاذي غير الدنيا باراكا اعليك من قوة لحساب
عزيني في الحياة اقبل ما الموت اعلينا تكتاب
يا لمخاصمني بلا اسباب ومخليني في لعذاب
سال اعليا انسال اعليك اقبل ما انرجعوا لتراب
ماتوا الجدود والوالدين ؤ الصحاب وشلا احباب
ادفناهم اجميع ولا اعقولنا اتعضت من المكتاب
يا لمخاصمني بلا اسباب ومخليني في لعذاب
لا اتغرك الدنيا وتولي في عينيك هي لحباب
ؤ تنسى لحليب والخاوة ويولي عيبك اجواب
خلينا نحييوا داك الدم اللي اتبخر ولا اسحاب
يا لمخاصمني بلا اسباب ومخليني في لعذاب
وسع خاطرك واتصنت ليا واعطيني اجواب
لا اتبيعني ارخيص وتحسبني من وجوه لعقاب
دابا انموت ؤلابد اتفكرني وخا انكون مجراب
يا لمخاصمني بلا اسباب ومخليني في لعذاب
دوز من احدايا راكب ما اتسلم ما دير اصواب
را ه المفتون بالدنيا يجمع تايعيا ويخليها لقراب
ؤ ما يدي امعاه غير حسنات اتكتبوا في لكتاب
يا لمخاصمني بلا اسباب ومخليني في لعذاب
كذب ظني فيك واعطي ل خو اكلامي اجواب
اضحك في وجهي وخا غير بضحكة كذاب
ونقول باقي عندي في الحياة واحد من لحباب
يا لمخاصمني بلا اسباب ومخليني في لعذاب
يا كما حاسبني طامع نورث فك اكدا وشعاب
أنا درت اوسخ الدنيا اورايا وكل ما ليا اكتاب
وليت انفكر انفوز بالجنة عند رب الأرباب
يا لمخاصمني بلا اسباب ومخليني في لعذاب
واش الله ابغانا انكونوا هاكا ولا لهتوف ؤ لهباب
انسينا الأصول وشطبناها من واجبنا تشطاب
العام اللي جا يلقانا امفرقين ياكلوا فينا الذياب
يا لمخاصمني بلا اسباب ومخليني في لعذاب
سال فيا انسال فيك وخا انديروا غير الصواب
راه العاطي الله اللي فرق الدنيا ارزاق بالسباب
ؤ احنا اتعلقنا بيها ونسينا في جرتها شلا احباب
يا لمخاصمني بلا اسباب ومخليني في لعقاب
طل اعليا اطليلة شوفني واحسبني غير غراب
لما انفعتك انوصيك كيف اتعزا فيا لا اكتاب
اقبل ما انموت وتسنى ايعزيك فيا لبعاد ؤ لقراب
يا لمخاصمني بلا اسباب ومخليني في لعذاب
لتبكيش اعليا لمت وانت امعيبني في الدنيا تعياب
حاسبني من قلة جهدي ابحال واحد من الكلاب
مكتوب اعليا نرضى بالشايطة المرمية من الباب
يا لمخاصمني بلا اسباب ومخليني في لعذاب
سول راسك غير مرة اعلاش لفراق اعلينا اكتاب
كنا خوت واليوم فرق بيناتنا الشيطان المشهاب
اظلامت العين عل العين وكلشي زاد اخياب
يا لمخاصمني بلا اسباب ومخليني في لعذاب
لتحسبني من اللي ايقولوا مرحبا باللي جا وجاب
جيني اطويل وريني وجهك وحسبني من لحباب
ؤ ما هم الدنيا راني ما ناكل منو غير اللي اكتاب
بقلمي
المصطفى لخضر
مساء يوم الإثنين 05 مارس 2018
ليست هناك تعليقات:
إرسال تعليق