قصيدة بعنوان فرع الحلاوة الاحمر
.........................
انت يا خاله...
وانت يا عمه
انت يا بت ..يا ست ...يا شابه...
شوفتيش أمي..؟
كانت ريحة السوق ف الضلمة
قبل أذان الفجر ...بحبه
رايحه تبيع كام كيلو البامية
و تجيب بيهم أكل الشهر
لحمة ...وفاكهة ...وكام كيس سكر
لجل تحلي العيشة القهر
كان يعجبني العيش لفرنجي
لما يكون متروس طعمية..
بس الأجمل.....
كان الفرع حلاوة الاحمر......
******
كانت أمي....
تمشي مسافة عشرين كيلو...
رايحه وجايه
بس بترجع أول واحدة...
لسه وراها البيت ...واللمه
كنت أنا دايما إيدي ف إيدها
إلا يادوبك
لما النوم - الله لا يسامحه - يفرق بينا
لما تسيبني....
كنت أتمرغ .. وسط الشارع
مايغركش الطول الفارع
أصل يادوبك ..
أكتر من سنتين وانا بأرضع.....!!
واملى البيت بالطوب على أختى
كات تضربني...
أهرب وأفضل بره العزبة
جنب مقام سيدنا (الضيف)...
وأفض جالس...
تحت الشمس ف عز الصيف
أسأل طوب الارض ...وأعيط
فينك يا أمه
أنا من غيرك كنت ضعيف
*****
قبل ما أشوفها
كنت أحس اللهفه بتجري ....
بين خطوتها
كانت ريحتة أمي تاخدني...
من بين كل الناس.... أعرفها
كنت أشم السوق فوق راسها..
كانت خلطة من الطعمية...
على كام حبة جوافة طرية...
أو شمامة..
أو على ريحة الحمة النية
كل ده كوم..
بس الفرع دا كان كوم تاني
ألمح لون الفرع ....أزيط.. من بركاني
وافرد بين الريح جنحاتي
أجرى أحضنها...
تنزل ...ترفع جسمى الفارع...فوق أكتافها
وأرفع حبل الفرع الاحمر.. من ضفايرها
يخلص واحد..
ألقى التاني ف قعر القفة
*****
أه يا أمايا..
فينك يا امه
مش عوايدها ...أيه أخرها....؟!!
حتى دى خرجت...قبل معادها
مين من صدرك يا امه حرمني..؟؟
والله ما عارف ..كنت أنا نايم....
وللا الدنيا العكره خدتني..
من أحضانها
لسه ماجتشي...؟!
لو هتمرغ .....هيقولوا مات مجنون ف غيابها
طيب فين الطوب فى الشارع....
وأضرب مين..؟؟
ماهى كبرت أختي...نفس حالتها
طيب أخرج بره الحته...
وأسأل كل حريم العزبة..؟؟
فينها الحته...؟!
فينهم كل حريم عزبتنا....؟!
*****
غبتي يا أمي...
وانا هنا جالس أعد ف عمري
عدى العمر يا أمي ف لحظة...
وأنا من هبلي....
عايش اللحظة بلحظة ف قلبي
فاكر نفسي هعيش اللحظة..
لما تجيني وأجرى عليكِ
برضه يا أمي....تنسي ضناكِ......؟؟
تنسي كمان الفرع الاحمر..؟!
تاخدي معاك القلب الاخضر...
وأكيد عارفه...
ال يصيبني أكيد هيصيبك..
مين من بعدك ..
تاني يحلى ف بقي السكر..
*****
وللا اقولك....
انا منتظرك...
كلها كده كام يوم ..وأقابلك....
بس تعالى خديني ف حضنك....
وإنتظريني ....
جنب مقام سيدنا (الضيف)...
راح اكون سبت بلدنا بحالها...
راح اكون بس يادوبك...ضيف
قبل ما أدخل قبري لوحدي...
واما يسيبني ولاد حتتنا...
إنت خديني أنام على صدرك ...
وافضلي جنبي
مشي الايد الناعمة عليا ..زى زمان
خليني تاني أحسك بدفئك...وأنا بردان
واما يجينى ملاك يسألنى..
إنت تردى...
أصل الخوف م الحق يا أمي
راح يرعبني
بس قليلهم إن أنا إبنك
وإحنا يا أمي غلابة ...هيسكت
واما أقوم م القبر يا أمي
والقى المولى عشان يحاسيبني
همسك إيدك...
وانت خدينى يا أمي ف قلبك..
زى عوايدك....
غطيلي وشي وقلبي بصبرك
قولي لرب الكون ..ولربك
إني بحبك
ربنا أعلم بل جرالنا...
مش هيردك....
أصل يا أمي الدنيا خانتني...بعد ما روحتي..
مسحت بيا الارض ف بعدك...
ربنا عالم إني بحبك...
راح يرحمني عشان ...أنا منك
******
مايو 2017
ليست هناك تعليقات:
إرسال تعليق