.... كل سنة وحبك طيب...
في الحب ألف حكاية وحكاية
بس حبك إنتي شكل تاني
حب صعب توصفه أشعاري
أو حتي ينكتب في الأغاني
زمانك كان زمن خير وحب
بعدك تاهت ف زمني المعاني
حب فيه شئ غريب عجيب
صعب يتبدل بأي حب تاني
م الطفولة للصبا للشباب
الشوق لحضنك طعم تاني
حدوتة حلوة وللا ملتوتة
وكان ياما كان حلو زماني
ومصحف عالمخدة يحميني
م الكوابيس اللي مخوفاني
وحضنك من جماله وحنانه
سكنت فيه حلاوة أحلامي
ونام نام ياضي عمري
الغنوة بعدك ملهاش معاني
موت مين ده اللي ياخدك
وإنتي روحك يامه سكناني
موت مين ده عني بعدك
وإنتي أقرب ليا من كياني
كل سنة وإنتي ست الحبايب
صعب بعدك ألقي حب تاني
صعب دمعة توصف بعدك
صعب أحب بعدك زماني
فاكر يامه المريلة والمدرسة
فاكر شقاوتي وفاكر جناني
فاكرة يوم ما قالوا غرق
وإنتي بتصرخي إبن زماني
يوم نجاحي ف إمتحان المدرسة
تصدقي بعدك ما فرحت تاني
كل سنة وإنتي جوايا عايشة
بس الشوق لحضنك نداني
قلت أعيد علي أغلي أم
وأعيد اللي كان من زماني
كل سنة وإنتي ست الحبايب
صعب بعد حبك القي حب تاني
كل سنة وإنتي لسة بسمة
تزورني لما يشتد بيا زماني
كل سنة وإنتي أحلي ذكري
كل سنة وإسمك أغلي الأسامي
كل سنة وزمانك يفضل زمان
عشته ونفسي يرجعلي تاني
....
أيمن بلال
ليست هناك تعليقات:
إرسال تعليق