دنيا باتيستا
على كل لون ألاقيكي ياباتيستا
فيكي البلية وفيكي الأسطى
فيكي فؤاد الطيب جدا
فيكي أمينة وطابع البوستة
فيكي من عض فى لحمك عضا
فيكي الأهتم عيشته أليسطا
فيكي من بنى فيكي ألفين سدا
والمتنطط زى السوستة
فيكي من عام على وش الفتة
وكل شوية يلقح جتة
واللي معضعض فيه الفقر
وكل شوية بينهش حتة
فيكي من خاف وفت ما شاف
ياعيني بعينه العين الحمرا
فيكي المنكر فيكي خشاف
والإتنين من نفس التمرة
فيكي زهورك فى البستان
فيكي كمان صحراء جرداء
فيكي الشق بيت التعبان
فيكي البلسم والترياق
فيكي مدينتك وجحيم دانتي
وفيكي بلاد الواء الواء
على كل لون كده فيكي ياباتيستا
لايميها بقا وإختشي ياباتيستا
بقلم طارق السيد
ليست هناك تعليقات:
إرسال تعليق