رَسَت المراكب:د.هشام الفقى
............................................
رَسَت المراكب فى الصباح
ع الشط رَست
بعد ليل فى حضن البحر
والموج مَست
يا مركبة خشب فوق بحور الليل
والموج بتسرح
وتعودى فوق الموج
بالعودة أنا بفرح
......................................
يا مركبة خشب وموتورك من حديد
بتبعدينا ليه بالفرقة من جديد
لو كنت حاسة بجد
طاب ليه طبعك عنيد
بتخدى مننا العمر وبتبعدينا بعيد
.............................
يا مركبة فاردة للريح قلوع
هل يا ترى أستريح ولا أبات موجوع
يا مركب عُمر فى نيل هادى وبيقدف
وليه العمر يشق الموج وساعة الفرح يتكتف
ويستنى فى حضن الشط
نسيم من بُعد بهفهف
ومركب تعود لنا فى يوم ضناها العمر بتلفلف
تعود للدفء من تانى
عيونها البُنى وحشانى
وطلعالى ببرد البحر بتكفكف
سلام بالأيدى ونظرة عين تدفيها
وتحميها ورمش يغطى ويجفف
............................................
يا مركب للحجاز رايحة
وبحلم عمرى بها الفرحة
ويوم العودة بالتهاليل
اشوف الشط على بُعده
أحس الصبح بعد الليل
...............................................
يا مركب كان لجيشنا عتاد
فتحنا بها ووصلنا لبُعد بلاد
ومن ينسى بطلنا المسلم إبن زياد
...................................................
مراكب عادت وحنب الشط إترَست
بعينى يا دوب إتبصت
وخيالى طار فى حكاويها
وطير النورس حواليها
يحاكيها
ويدعى ربى يحميها
فبسمه وحده مجريها ومرسيها
د.هشام الفقى
ليست هناك تعليقات:
إرسال تعليق