(ميت فدا عينيكى )
والقلب كان أشبه
بقليبك الوردى
لما فى يوم يدى
حبة أمان وحنان
كان الولد مرضى
بينام على صوتك
ويقوم على القرآن
بيصلى يدعيلك
إنك تكونى ليه
كل المزايا فيه
بس انتى ليها مكان
كان الهوى بادمان
كان يعشق الضحكة
من ثغرك الطيب
كان ليكى بيطيب
كان الولد إنسان
وبرغم من سنه
لكن حاسس انه
راجل بيحميكى
موجود فى أى مكان
فى الدرس والحصة
بيحب بالبصة
خايف فى يوم ينطق
يخسر ينول حرمان
وانتى فى هواكى كتير
والكل حبوكى
شوفتى الولد ده أمير
بس فى مقام أخوكى
قولتى احنا لسه صغار
والعشق ليه ناسه
قدتى فى قليبه النار
لكن على راسه
راضى تكونوا اخوات
ما كفاية بيشوفك
جوه فى عينيكى يبات
يتملى فى كسوفك
عاش الولد مبسوط
حلمه يكون ليكى
خاف الولد م الموت
جرب وقال ليكى
بس الجواب كان ايه
بعتى الولد سيبتيه
واللى انتى بتحبيه
برضوا غدر بيكى
وأما القليب اتخان
والجرح كان عنوان
طوفتى فى كل مكان
والدمع فى عينيكى
راجعة لحب زمان
وأجمل حنان وأمان
بس الولد كان فان
ميت فدا عينيكى
ليست هناك تعليقات:
إرسال تعليق