أكنش أتعميت
...................
في غيابك
كل الصور مقلوبه
ومش حاضره
كأني بشوف ناس تانية
إحساسي بيك مش واضح
كأني أتعميت.
ومش شايف
ولا حاسس باي وجود
حكيتلك مرة ما صدقتش
وقلت بعدك أنا ميت
وقلت حاجات ومش حاسس
كلامي ازاي بيوصلك
وليه صورتك بقت مهزوزة
ومش واضحة في عينيا
أكنش ميت ومش حاسس
وأنا فاكر إني. أتعميت !!!
وليه إحساسك غاب من قلبي
مع إني عايش لسه وبتنفس
وروحي خارجه بخروجك
مع إنك سقيني مرار
لعنت الحب في وجودك
وقلت أبعد
لقيت حبك عاملي حصار
لا راضي يقول أنا جنبك
ولا راضي أكون له دار
بقيت تايه منيش عارف
مفتح بس مش شايف
حقايق بينا مكسوفه تشوف النور
وصور بهتانه
ومش قادرة تعدي السور
وأنا واقف ومستني
يمكن أشوف الصورة معدوله
ولاقي حلمي مش محظور
جمعت كل المر في ضلوعي
وقلت أصبر
أتاري الصبر عدى بحور
وأتاريني واقف ومستني
بهتان حلمي جوايا ومكسور
صور كتير تعدي قدامي
وإحساس جوايا
مشتاق يشوف النور
وأنا واقف في مكاني
مش شايف غير صنم
شيطان من نار مكتفني
أتاريه ظلي وأنا فاكرة
شيطان ماسك في رجليا
كل حدود المنطق أنا عديتها
وكنت بقول أنا بيك أكتفيت
لكني حاسس دلوقتي
مع وجودك مع إنك قدامي
بس مش شايفك
يمكن أكون بقيت ميت
ويمكن أكون مع وجودك
أنا حي بس أتعميت
........................
بقلمي /حمدي رمضان. ( حمدي رمضان
ليست هناك تعليقات:
إرسال تعليق