عذاب الحب.... بقلم طارق السيد
من قلب حب وإتظلم
من قلب معصور بالألم
والخدّ خد يجي مية قلم
ولسة دايب برضو فيك
بنده عليك وأمد إيدي
وأدعي ربي ياروحي تيجي
تيجي تخلي يومي عيدي
ياضي عيني روحي فيك
لامني العوازل ع الخضوع
وذل نفسي والخنوع
والإرادة الطايعة طوع
وكل دا عشان شاريك
ياطير وطاير في العلالي
عشك مستنيك ياغالي
مش صعبان عليك ليه حالي
بشتكيك منك إليك
عصفور نحيل مكسور جناحه
ليل نهار بتقيد جراحه
بدل غناه تسمع نواحه
والسبب من حبه فيك
ضاق عليه عشه وبراحه
والمسا أصبح صباحه
والعذاب إللي إستباحه
يتمحي بنظرة عينيك
حلمت بالأمان كتير
حلمت حتى إني أمير
في قصر فاح منه العبير
بس من لمسة إديك
وبرغم إن العين بصيرة
إلا إن الإيد قصيرة
نفسي ياسمو الأميرة
تقولي يوم هرق ليك
ليست هناك تعليقات:
إرسال تعليق