انتهى الدرس ياغافل
ياعنب الشام يايلح اليمن
يامحروم يانا من الإتنين
مافيش فى حياتى غير الأحزان
وعذاب وآهات ودموع العين
بحر وموجو بيضرب فيا ...
موجه ورا موجه والموجه عفيه
وسما مليانه صقور ونسور
وانا طير مجروح وجناحى مكسور
مش عارف ليه أنا عيشتى فى غم
وليه الهم ما راضى يتلم
دنيا وطاحنه ياناس فى عضامى
ماشوفت بصيص من نور قدامى
نمت ودمع الذل فى عينى
أتمنى فى حلمى السعد يجينى
طيف صحانى وقالى ياغافل
صلى الفرض وصلى نوافل
يالمكفول أذكر فى الكافل
تلقى الخير جايلك فى قوافل
ده اللى لسانه مايذكر ربه ..
عيشة الضنك بسيفها تحاربه
قمت بسرعه أتوضى واصلى
وادعى لربى يعينى تملى
لسانى وقلبى يعيشوا بذكره
وأصد فى شر شيطانى ومكره
ياللى فهمت الدرس إفتكره
وياللى ماتفهم درسى .. تذاكره
بقلم طارق السيد
ليست هناك تعليقات:
إرسال تعليق