{ على شفاف النهر }
خاطرة مكتوبة بالعامية
~~~~~~~~~~~~
ما بدّي أكتب وأحلم
كافي بقى قلبي يكتب ألم
وما بدّي بـ بحور الشعر
أُبحر وأغرم
وأكتب حروف الغرام
على وراق القمر
وما بدّي يقتلني الضجر
وأكتب بـ القلم
حروف مجنوني
وخبيها بـ مراسيل العشق
وعطّرها وأرميلك ياها
مطرح ما بتكوني
ومتل البرق بـ لمعة عيوني
أهرب خلف الشمس ودوب
ولا بدّي من بعد ما حن
أخوت وجن
وأكتب على الحيطان
لـ عيونك قصدان
وكلمة بحبگ ..... وأرسم قلوب
....... لا تخافي
عـ حروفنا المنحوتي
على الصفصافي
بعدها بـ الف عافي
وقعوا وراقها الصفرا
عـ شفاف النهر
وماتت من القهر
وبعدها قلوبنا عـ جذعها منحوتي
من كم مية شهر
وبعدو حبگ بـ القلب دايب بـ سكوتي
متل الجمر دافي
وبعدو عطر شالگ السكران
سهران مش غافي
ناطر لا تتاوب عيون السهر
ويغفى نجم الحب عـ خد القمر
لا يجي حافي
يعربش ويغفى على كتافي
دخلگ .... لا تحملي هم
بس انتِ تعي .... كوني معي
وخليني أحمل انا لـ ذنوب
وكب القلم
ولملم من محبرة قلبي
كل حروف أشواقي
وعلى جرح قلبي المصلوب
أحرق وجع مكتوب
مخبى بـ وراقي
وأرميهم على الدروب
وشفافي تكتب
عـ خمرة شفافگ
الف مكتوب
علاء الغريب
ليست هناك تعليقات:
إرسال تعليق