أنا العربي
وأنا اللي اتهان
مابين جهل حكامي
وبين الظلم والطغيان
أنا العربي وكان ياما كان
أنا السوري .......
أنا السوري وأنا المقتول
أنا اللي دمي كده بينزف
أنا اللي بقالي سنين عايش
في ليل على طول
أنا اللي دمي متفرق هنا وهناك
مابين حكام
بتتآمر على موتي وحزب شيطان
فرنسي وروسي وأمريكي
وضيف ليهم كمان. إيران .
أنا المشرد في كل مكان
أنا اللي عايش هنا بينكم بدون عنوان
أصل أنا عربي رخيص الدم يا إنسان
وأنا الفلسطيني ..........
أنا الفلسطيني وأنا اللي
دمي على الارض م العدو سال
أنا اللي عايش
سنين عمري تحت ظلم الإحتلال
أنا اللي على إيد الصهاينه
يوماتي بشوف إذلال
أنا المشرد بدون عنوان
مليش وطن يأويني
ولا أخ جنبي يحميني
يكون سندي ويكون لي أمان
أنا عربي وخسارة أقول أنا عربي
وأنا مشرد في العالم مليش عنوان
أنا المصري .........
أنا اللي قتلوا أصحابي
وأنا اللي سجنوا أحبابي
ويوم ما قلت ياثوره
قالوا عليا إرهابي
برصاص الغدر قتلوني
وفي الميدان سحلوني
وقالوا عليا عميل وجبان
أنا المصري أنا اللي اتهان
وأنا اللي اتجرفت في الميدان
أنا العربي وخسارة اقول انا عربي
أنا اليمني ............
أنا اللي سرقوا خيراتي
أنا اللي نهبوا ثرواتي
أنا اليمني أنا الإنسان
أنا اللي خلوني أحارب إخواتي
أنا في نظرهم عميل وجبان
بتآمر على بلادي وفين بلادي
أنا اليمني معروف حبي للأوطان
كان السلم عنواني في كل مكان
أنا اليمني ودي بلادي
ودي روحي فدا الأوطان
أنا العربي فوقة صحيااااااااااااان
أنا العراقي ..............
أنا اللي بسكوت العرب
عني أصبحت مهان
أنا اللي إخواتي بجهلهم قتلوني
وجابوا عدو خسيس وجبان
بيقتلني أنا وأخواتي
بيدمر كل خيراتي
وبين سني وبين شيعي الفرق يبان
أنا العربي
والعربي رخيص الدم في كل مكان
أنا اللبناني ............
أنا لبناني مهمش في كل مكان
مش قادره حكومتي تحميني
وحزب شيطان بيكويني
أنا اللي سابوني العرب وحدي
أقضي العمر في التوهان
أنا العربي وكان ياما كان
أنا الليبي ..........
وأنا اللي اتفننوا في تعذيبي
وأنا اللي تركوني
سنين عايش تحت حصار
سابوني الجهل عنواني
مفيش منقذ مفيش أفكار
ولما قلت يا ثورة قتلوني
وقتلوا الثورة في مهدها بالنار
ولسه دمي مانشفشي ولسه حصار
وبرضه بقول أنا عربي
ولسه عايش في قلب دمار
أنا العربي
أنا الخاين في عيون أعدائي
وأنا المهزوم في كل مكان
أصل أنا عربي
والعربي رخيص الدم في كل مكان
.....................
بقلمي / حمدي رمضان ابوعمرو الريشي
ليست هناك تعليقات:
إرسال تعليق