عبده مجانس
أنا إسمي عبده مجانس
أنا جن مصوّر خالص
أتشقلب أطير في الجو
وأسِدّ في أي مجالس
الفهد يشوفني بيهرب
والنمر ألقاه متكهرب
بفطر وأتغدى ديابة
طبعاً ماأنا ملك الغابة
أنا عيني بتطق شرار
أنا دمي مولّع نار
لمّا أعدي في شارع
الكل يقف زنهار
ياسي عبده أفندي مجانس
يابو دم خفيف قوي خالص
ياشقلباظ الجو
تتشقلب تيجي في التوّ
ياسوبر مان قوي خالص
ياعم ياملك الغابة
ياللي بتتغدى ديابة
ياعم إتلهي على عينك
يافقري داير بربابة
ياللي إنت مكهرب نمر
ياإبن الهنود الحمر
إسمحلي ياوحش إن قلت
سيادتك تيجي كام فولت
يابو عين بتطق شرار
ليه الناس وقفت زنهار
يمكن علشان بتدّق
ف نعشك آخر مسمار
نصيحة ياعم مجانس
ياأراجوز كل مجالس
الفتّونة مش بالقوة
ولا هز كتاف ومجانس
بقلم طارق السيد
ليست هناك تعليقات:
إرسال تعليق