إحنا الغلابة
إحنا الغلابة وإحنا اللي شاربين المر
إحنا اللي بنشقى في البرد وف عز الحر
وإحنا اللي بنتحمل ونكبش بإيدنا الجمر
ويحسدونا الاغنيا على الرضا والصبر
إحنا الغلابة ويفتكرونا اغنيا
عشان الكرامة هي اللي فاضلة عندنا
وعفة النفس والقناعة هما غطانا وسترنا
ويحسدونا الاغنيا على رحمتنا ببعضنا
إحنا الغلابة وفي الشدة تلاقينا
نموت عشان البلد ولا حد بيعزينا
ونشيل هم البلد وهي م المر تسقينا
ويحسدونا الأغنيا على عزة النفس فينا
إحنا الغلابة و زرعنا الأمل في ولادنا
وقلنا هما الأمل وهما في الشقا زادنا
عملنا عشانهم المستحيل و والله ما فادنا
ويحسدونا الأغنيا اللي كوشوا على خير بلادنا
إحنا الغلابة اللي أتحرمنا من حقنا
ولما فكرنا نطالب جابوا الغلط عندنا
ولما فكرنا نهاجر غرقنا في بحرنا
ويحسدونا الأغنيا وهما سبب همنا
ليست هناك تعليقات:
إرسال تعليق