((سلسلة قصائد الكناري))
عصفور كناري
عصفور كناري فصيح وقاري
يحكي الحكاوي يغزل غناوي
نسمعها نفهم كل الحكاية
والحكاية قديمة جدا
أيام ماكان فيه ديك بيدن
والصور مالية المرايا
وكل صورة وراها قصة
في كل قصة بيبص بصة
ويشوف بعينه أصل الحكاية
يجي طاير يغني لينا
يحكي قصة فيها عبرة لينا
والعبرة دايما في النهاية
وعشان كناري عصفور آراري
لف النجوع دار في البراري
بإختصار شاف في المرايا
شاف الأليف شاف وحش ضاري
شاف برضو بلسم شاف سم هاري
بدأ بصورة لست أم نورا
فقيرة دقة بعيون كفيفة
ربت ولادها في خدمة بلدها
برغم الديابة طاهرة وعفيفة
وصورة تانية للبنت منة
صاحبة ماريا بنت أم حنا
وحنا لما ف فرحها غنى
ياأحلى منة ياتمر حنة
فرحك فرحنا عشان إنتو وإحنا
ياأخت منة منكم ومنا
وصورة تالتة لآدان في مالطة
والناس في غفلة من المنية
وإللي ذاد ياناس وغطى
عايشين في حفلة تنكرية
إللي لابس لبس باشا
وهو في الأصل الحرامي
كل يوم ياكل بغاشا
وإن يخاف يقول يامامي
من سبع لابس ماسك غول
مايفرّق بين دول ودول
ينهش إللي يخون بلادة
إذا كان بدقن أو فلول
وإللي لابسة ماسك عبلة
وعايزة عنتر يحتويها
زي هبلة ماسكة طبلة
تدق ليل نهار عليها
ياست عبلة عيب عليكي
إختشي لانظن فيكي
عايزة يجي 100 رصاصة
تندب ف حباب عنيكي
سكت الكناري عن الكلام
إذا كان مباح أومستباح
فرد جناحة وقال سلام
الصباح دايما رباح
بكرة أجيلكم بالمرايا
والصور 100 حكاية
سلام ياأجمل ناس سلام
سلام سلام ياناس تمام
بقلم طارق السيد
.............................................................................................................................................
كناري الحواري
أنا الكناري إبن الحواري
إللي منها نجم والشيخ إمام
وتملي داري أنا باللي جاري
من نسر جارح أو من الحمام
طبيب مداوي عفريت مخاوي
أمسك ربابة وكأني راوي
أحكي الحكاية في صور مرايا
وأسحركوا بيها وكأني حاوي
أبدأ بصورة لسباع جسورة
بلبس كاكي بتقول فداكي
يامصر دا انتي راحتك دوانا
وإللي يعاديكي أو ذم فيكي
أو يوم يفكر يتعشى بيكي
هيكون بإذن الله غدانا
وصورة تانية لشاب فافي
إبن أونكل وطانط صافي
ساكن كذلك حي الزمالك
ياسيدي يسكن إيه العيب في ذلك
لاكن أيضا في شيئ هنالك
نصيحة مني منقولة عني
ياإبن الزمالك إنشف شوية
شوفلك وظيفة ليه تكون هفية
شمر كمامك وإبني في بلادك
تبقى قدوة لطموح ولادك
ونصيحة أخرى ياإبن الزمالك
خلي يابني التقوى ذادك
وصورة تالتة و دي صورة فلتة
لعباس أفندي إبن الأصول
بس الأفندي غلط له غلطة
على راس جنابه دقت طبول
سي لفندي بصبص لجارته هالة
والست هالة لجل العدالة
صرخت في وشه وبأعلى صوتها
قالت يافندي بطل رزالة
ظهر له فجأة شمشون يغيتها
رقّع صداغة وبوكسين كمالة
هنا الكناري بطل كلام
فرد جناحه وقال سلام
وأجيلكو بكرة معايا المرايا
وفي كل صورة أحكي الحكاية
سلام سلام ياناس تمام
بقلم طارق السيد
.........................................................................................................................................
الكناري المتنور
أنا الكناري المتنور
عصفور عجيب جن مصور
تنادي أحضر في التو
وأتشقلب لك في الجو
علشان الشقلباظات
في أصول فن الحركات
بالدرس الكامن طيه
نوع من إثبات الذات
هضربلي أنا شقلباظين
فتحلي إنت العينتين
وشاورلي بأي إشارة
لو شوفت غراب البين
هحكيلكم كده بالصورة
بس تحلوا الفزورة
وإن ماتحلوها تحطوا
العارجة على المكسورة
بيبان لنا كده في الصورة
واحد كرمش في القورة
وإتعنطز قوي بالجامد
وكأنه الرجل الغامض
تنين العصر الحجري
وبركان النار الخامد
يتكبر ويقولك
ماتعرفنيش أنا مين
أنا أقدر أكلك كلك
من راسك للكعبين
ياللي إنت مكرمش قورة
ولسة عايش في الدور
ياما أكبر منك كرمش
ماتشوف عينك إلا النور
طرمناله سنانه
وملصناله ودانه
لا يهمنا عنتر عبس
ولا حتى أبو زيد في زمانه
بقلم طارق السيد
...............................................................................................................................
كناري جالكو
كناري جالكو بكام صورة
يغني بصوته الحياني
ويحكي القصة المشهورة
من شق الحارة الجواني
من بعد مابان في البنورة
البنا وأصله الحلواني
بنى مصر الطوبة على الطوبة
وليّسهم فستق ورواني
العيب بس في ألاضيشها
خفافيشها وعاملين دراويشها
ماهي مصر الفرخة البيّاضة
حالفين قال إيه ينتفوا ريشها
عيني عليكي ياعتقيّة
يامطمعة فيكي فرارجيّة
تسلمي من كل الدبّيحة
يابلدي يامصرنا يابهية
والصورة التانية دي إعجوبة
عن بنت عجيبة ولهلوبة
الصبح القطة القطقوطة
وبالليل مكارة وتعلوبة
يابنت الإيه إنتي ياقطة
ياشاغلة قلوب كل الحتة
ياما غيرك سبقك وإتغندر
بلحاف العار نام وإتغطى
والصورة التالتة في حكاويا
لسفينة مصر العربية
مابين الموج الإرهابي
ورياح الكره الغربية
راح ترسي يامصر ف مراسيكي
بإذن الله إللي حاميكي
مايهمك موجهم ورياحهم
مافي حد هيقدر يإذيكي
بقلم طارق السيد
...............................................................................................
جراح الكناري
كناري مكسور الجناح
بعود نحيل مليان جراح
واقف لوحده في البراري
في ليل طويل بعدوش صباح
ذاد نحيبه والنواح
لما هبت الرياح
شافها هبّه إستخبى
عشان ضعيف ومستباح
م إللي جاي وإللي رايح
نسر جارح صقر طايح
كله سارح في المطارح
إللي قوته الجناح
وإللي منقاره السلاح
وإللي هابش بالمخالب
كله هاجم بإجتياح
بإختصار كل الجوارح
رايحة راجعة بالدبايح
إللي ميت وإللي فرفر
وإللي دمه لسة سايح
يادنيا جيتي عليا كتير
وأنا عصفور من حقي أطير
نفسي يادنيا أعدي السور
نفسي عنيا تشوف النور
وأرجع أغني مع العصافير
وأرقص على نغم المزامير
بقلم طارق السيد
ليست هناك تعليقات:
إرسال تعليق