تلاوين الحب
سهم الحزن ليه صايب
قلب أغلى الحبايب
ياحبيبي إحكيلي أواسيك
ياواد إنت أنا دايب فيك
مالك ياحبيبي متضايق
مخنوق ليه ومش طايق
إحكيلي وريح بالك
وأنا أشيل الهم بدالك
فضفض ياحبيب قلبي
فضفض وإوعى تخبي
كلمني وطمني
سكوتك هيجنني
أنا مشغول بالي عليك
ريحني الله يخليك
إحكيلي ياروحي إحكيلي
إحكيلي وربي وكيلي
لأزيل همك عنك
ياحبيب قلبي لأنك
روح الروح ياحياتي
وأجمل ما ف دنياتي
ما تفرفش بقا ياجميل
وميل ع الفرح يميل
الدنيا لازم تتعاش
مع إنها مابتسواش
لكن إحنا الحق علينا
سلمناها رقابينا
إنساها ياروحي إنساها
وإنسى الهم معاها
وعيش اللحظة الحلوة
وقوم غنيلك غنوة
أو أرقصلك رقصاية
وإضحك علّي الضحكاية
وتعالى قرب هنا جنبي
نعيش الدنيا البمبي
وإحنا إللي نلونها
ونشكل تلاوينها
من غير إسود ولا بني
أما اللون الكحلي
دا لون غامق مسموحلي
عشان لون الناموسية
يجعل لياليا هنية
بقلم طارق السيد
ليست هناك تعليقات:
إرسال تعليق