احلام للبيع
ببيع أحلام
تعا قرّب ومايهمكش
تدفع كام
كمان مسموح
تفاصل ف التمن
والصنف
وترمح ف اللي كان
مرموح
ولو بتنوح
حلمي يزغزغك
تضحك
تكمل رمح
وميهمكش
تعدّى فوق
جرون فيها الامل
والتيه
هتدخل في برارى
الصمت
هتطلع منها واحد
صح
هتتمرجح على
حبال الوجع
وحديك
تمد ايديك
وتلمس فرح
وقلّب شوف
ياعمى
دا الجراب
مليان
ولا مكسوف
من الكوابيس
ولا خزيان
معايا أحلام
علي قد اللحاف
زحّاف
وعندى أحلام
في ساعة الضلام
كشّاف
وحلم شجاع
وحلم يخاف
وحلم اعمى
لاكين شوّاف
وحلم بصير
وحلم قصير
وحلم للسفين
مسامير
وللشبّاك
حلم يكون
ساعات
اضلاف
وحلم يخبى
مهمن شاف
وحلم طرى
وحلم نَشاف
ودى أحلام
كتير بايره
خد منها
اللي بيكفيك
وفيه تانى
جِراب ياعم
معايا حلم
كان مغشوش
وحلم فاشوش
وحلم زى
حلّق حوش
وفيه فانكوش
وحلم عرفنى
ماعرفتوش
وحلم عرفتو
ماعرفنيش
وحلم يبص
من ورا
شيش
وحلم حلمني
ماحلمتوش
وحلم حلمتو
ماحلمنيش
وحلم يموت
وحلم يعيش
وحلم كمان
يهد الحيل
وحلم كمان
يهز عروش
وحلم يسيب
بعده رتوش
وحلم يوضى
نوره وشوش
وحلم يدوب
وحلم يقب
وحلم لو
حضنته
يبوش
وحلم يكون
لعين الشوف
وحلم يكون
عيون ورموش
فقول ياعم
عاوز ايه
وانا اديك
لحلم يجيب
هنا بحرك
مكان البحر
هبيوديك
وهات ودنك
هتحفظ سر؟!
معاى أحلام
يا صاحبى
لِوطن مجهول
بياكل في
عياله الغول
وقاتل يستخبى
هناك
من المقتول
وطن باع النسيج
والنول
ومهمّا تقول
ودانه تقيله
مابتسمعش
ومايأثرش فيه
النايّ
لمّا يبوح
بوجع الروح
ولا الارغول
ولا اقولك
ماتحبسناش
وسيبك م الشوال
والكيس
لقيت طلبك
خلاص عندى
متحلمنشى
اواستنه
معايا أحلام
لناس ميتين
واحلام. نقلت
ف الدين
واحلام مركت
غراب. البين
واحلام طولت
ف العمر
وليل الحزن
كرمشها
واحلا م
لسعادته
في لحظه انس
مرمشها
واحلام لسه
بنطلعها
من خيشها
ودى أحلام
مع الكراكيب
خرج بيوت
بتعفشها
بتيجي. هنا
بنصلحها
ونعيشها
شعر. عاطف الشيمي
ليست هناك تعليقات:
إرسال تعليق