ضمير القلم
************
إكتب وزوق بالقلم
آهو ف النهايه كلام زواق
ومعدش فيه شيء محترم
كله ف مزاد عايش سباق
الحرف ضايع م الضمير
والصدق مات م الاختناق
الكل حاسب نفسه شيخ
وف إيده سبحه بترسمه
لا ف قلبه رحمة ولا احترام
حبة مظاهر تخدمه
فرعون وطايح ف الحياه
لكن جوارحه بترجمه
مستني ايه علشان تفوق
فاكر نفوذك يعصمك
ده العمر لحظة ونفترق
وتلاقي عتمه بتخطفك
وايدين شديدة بتمسكك
من غير هواده بتخسفك
عايش حياتك نرجسي
ولا مره لحظة بتختشي
تجرح وقلبك ينتشي
ولا مره شفت غير الأنا
هتعيش سراب
وتموت سراب
تحت التراب مفيهوش أنا
هتمر بيك أيام ضنا
ويمر بيك اليوم سنه
وساعتها وحدك ف التراب
من غير نفوذ
من غير غنى
إكتب يا قلبي بدون دموع
عمر الحنان ما كان خضوع
يكفيني عايش ف الحياه
قلمي ف إيدي كله طوع
لا مره خضت مع القطيع
ولا مره كنت ف يوم ببيع
ولا إيدي مسكت شئ حرام
ولحكم ربي أرضى واطيع
لكن بيجرحني البشر
لو حد تاجر بالجريح
أو حول الفرعون آله
والحق قدامه صريح
ف السجدة قلبي بيتغسل
وبصوت كلام الله بدوب
وبذكر طه بتعسر
يصفي لي قلبي بدون كروب
يمكن أنا زي البشر
جوايا حبه م العيوب
لكن ما يوم جفت دموعي
لو قابلني ف يوم حزين
ببكي بألم وياه بحسي
وف وريدي بحر الحنين
عايش وبستنى الصباح
بحلم ف يوم ألقاه متاح
والضي يطلع من غيومه
والأمل يصبح مباح
الأمل يصبح مباح ‘‘
بقلمي / إبراهيم فهمي المحامي
ليست هناك تعليقات:
إرسال تعليق