سنين في الغربة
بعد سنين الغربة شافوني
قالوا جايب إيه من برة
قولت ياريتهم لو سألوني
أنا في الغربة بكيت كام مرة
جبت حاجات م اللى يحبوها
جبت فلوس وياريت ياخدوها
ويردولي شباب ضاع منى
وسنين مُتْ وهم عاشوها
على إيه بس يا ناس
حاسديني
وأشقى ما فيكم أسعد مني
إنتم عشتم أحلى سنينكم
وأنا فى الغربة ماعِشْتش سني
أنا إل كبرت قبل أوانى
بختي كمان ع الغربة رماني
خدوا أهه كل إل جمعته
وأرجع بس صغير من تاني
أنا راح عمري ألم ودموع
أنا قَضّيتها سَفَرْ ورجوع
وإن فكرت أضحك من قلبي
قلب الغربة يقول ممنوع
اتحملت ياناس فوق طاقتي
واتغربت فى عز براءتي
كتبوا لكل الناس عنوانها
وأنا كتبولي غريب فى بطاقتي
تَمَنْ الغُربة دَفَعْتُه بدمي
بسنين فيها بعيد عن أُمي
وأما نويت أرجع علشانها
رَحَلتْ لأجل تزَوِّدْ هَمّي
مين في الغربة ياناس
مبسوط
مين على راحتُه ومش
مضغوط
مين وأتحدى يقول مش
خايف
إنه بعيد عن بلده يموت
ياللي بتسعَى عشان تِتْغَرَّبْ
خُدها نصيحة وإوعى تجرَّبْ
كُلها بدُقَّة فى بلدك وإوعى
من مشاوير الغربة تْقَرَّبْ
أنا عن نفسي حأفك الطوق
أنا مش ح أقبل أعيش مخنوق
عايز أرجع فوق رجليا
مش عايز أرجع فى الصندوق
بقلمي عصام الباز
هذه القصيدة كتبتها 2006
ليست هناك تعليقات:
إرسال تعليق