فى حب مصر
******************
حبى لبلدى ما هيقل
لو حتى تعبان لسعنى
حملك غيرك ما هيقل
الغربة حوت وبلعنى
****************
حملى منك يا غربة تقل
وشوقى لبلدى لوعنى
مارمانى عليكى غير القل
وحاكم للكفيل باعنى
*******************
الصبر ميزه بين الخلق
وصبرى ع الغربه صبرين
طعام الردى مرر الحلق
ولجل الضرورة صبرين
*******************
مجبور ع الغربه و كاره
فراق الاحباب. وولدى
ف السفر شفنا المكاره
ولا شفنا خيرك يا بلدى
********************
يا حته من قلبى يا مصر
ليه تبيعينى. لابو عقال
عز شبابى عصرونى عصر
واخرتها لا صحه ولا مال
********************
مدام يرضيكى ذلى
لاتبكى على تنوحى
ف الغربه باعنى خلى
وسكوتك زود جروحى
********************
عشنا غربتنا جمع وطرح
والجنيه ع الجنيه اتنين
ما دقنا منها يومين فرح
وضاع من حياتنا سنين
*******************
ليلك يا غربه طويل
اطول من المسافات
عايش وقلبى عليل
واعد كام يوم فات
*******************
سهران وطيفك يابلدى سارى
وليل مع نهار احسب رجوعى
حزين ودمعى ع الخدود جاري
مشتاق لنخل عزبك والنجوعى
***********************
يا بلد كارهه ولادك ليه
ليه يا شيخه تغربيهم
تربى وترعى عيال معاليه
وعيال الغلابه تضربيهم
**********************
انا عايزك تكونى امى
واحس انك بتاعتى
سعتها افديكى بدمى
واتحمل لو. وجعتى
*********************
عليكى يا مصر السلام
يا هبة النيل. تحياتى
الخلاصه ولب الكلام
انتى عزى و امنياتى
********************
تحياتى يامصر
ليست هناك تعليقات:
إرسال تعليق