*حكاية مكتبة*
من هنا فى نفس المكان
خرجت تراتيل النضال .. تغنى فى ساحات القتال
زرعت رايات النصر .. مروية بالدم اللى سال
مدحت رجال أبطال .. دمروا بارليف بمياة القنال
من هنا كانت حكاية مكتبة
سطرت بحروف غزالها أعظم ملحمة
عدى صداها بالوتر والكف .. والغنوة كانت قنبلة
ضربت أذان الجمع من شرقها لغربها
طرحت بذور بعد ما كانت شبه بور .. مليون سنبلة
واتجمعوا السكان .. من كل مكان .. من اسكندرية ﻷسوان
على صوت غزال .. بيغني ويا الولاد .. ويحي على الجهاد
من هنا بدأت أصوات المعركة
رعبت قلوب العدا .. هزت جنازير المركبات
من بعد قولة فات الكتير يا بلدنا .. والله وفات
رهبت كيان خسيس .. هدمت مبانى المعسكرات
من هنا طار الحمام
ناح على غصون الشجر .. هز الزينات بالجناح
بيكلم غزالى بالنواح .. انا جاهز بريشي للكفاح
لو خلص عضم اخوك اللى راح .. هاخلى منقاري سلاح
دم الصهاينة ليا مستباح .. مانيش احسن من اللى دمهم ع الارض ساح
من هنا فى نفس المكان .. خرجت تراتيل النضال
ليست هناك تعليقات:
إرسال تعليق