دنيا وناس
مش كل واحد ركب الخيل يصبح خيّال
ولا كل واحد مسك الناي يغزل موال
ولا كل من قال جاب م الأخر
مهما يكون الواد قوال
عشان الدنيا على دي وديهيا
فيها المجدع فيها هفية
فيها الصالح ويا الطالح
فيها الفارس ماله مطية
يادنيا ماتهدي شوية علينا
فينا يادنيا اللي مكفينا
والأيام الحلوة فاتتنا
وحل مكانها سواد ليالينا
عايشين كل حياتنا ف مغطس
كل مانيجي نقب بنغطس
دايسة برجلك على رقابينا
شيلي رجليكي كفاية هنفطس
راحت فين ضحكتنا الصافية
ليه بقينا بنضحك بالعافية
ومانسمع غير اللي بيوجع
فين بلا قافية الكلمة الشافية
راحت فين م الناس الطيبة
وليه لابسين جلابيت العيبة
ياناس أرجوكو إرجعوا تاني ناس
جاتكم وكسة وألفين خيبة
ليه على طول تايهين في متاهة
إللي ياعيني ندهته نداهة
والمبسوط فيها بتوهانه
واللي ظلم نفسه ودساها
ياناس إرجعوا من تاني لله
ماهينجدكو ياخلق سواه
نصيحتي بقولها انا للمندوه
واللي شيطانه ياحسرة غواه
بقلم طارق السيد
ليست هناك تعليقات:
إرسال تعليق