ياريتنا شباب
بقلم الشاعر / طارق العيسوى
=======
سنين فاتت
وحلم العمر ويايا
صحيح باتت
ايامى كلها ورايا
ابات انعى
سنين عمرى
ايام ماكانت دنيتى معايا
شباب ساطع بلون فاقع
ويتمخطر سعدى بصبايا
وخطوتى تهد الكون
ولد طايش صحيح مجنون
وطاير فوق لسمايا
كأنى يابنى مش شايف
غير جبروتى جوايا
---
ولد عاشق--
بقصة حب حراقة
تعدى سنين --
وقلوبنا لسة مشتاقة
دنيا تاخدنى -- وتجيبنى
دنيا غرورة سراقة
وجالك يوم
دمعتى ياعين لفراقه
تروح ليام -- وتيجى ايام
وباصحى وانام على شوقه
----
وخط الشيب
وخطى الشيب على سنينى
ومد ايديه يصحينى
قوم يابنى وداوينى
اقوله ياشيب
بلاها العيب
بلاش للهم تدعينى
--
وكل مااقول كبرت ياواد
الاقى الدنيا تنسينى
وابات مشتاق
واقوم مشتاق
يادنيا الحب ضمينى
اقوم مشتاق
لدى الايام وحلو كلام
وشهد سلام وشهر خصام
حرام يادنيا تعاندينى
---
انا شايب ولا شباب
قليب اخضر يساع احباب
الوف واكتر واهى اسباب
--
بشوفها دنيا زهرية
مفروشة ورود ومرامية
ووقت الهجر اشوفها ضباب
--
واشتاق لعيون عسلية
يانن العين يابهية
ياعاملة محبتى غية
صعيب والله
فراق لاحباب
ياريتنا شباب
----------------------------
طارق العيسوى
ليست هناك تعليقات:
إرسال تعليق