أيوه صعب ـ الشاعر أحمد طلبه

أيوه صعب
انتي ليه زعلانه مني
ماانتي عارفه إن طبعي
أيوه صعب

وانتي عارفه لما بزعل
بنسا إني
عندي قلب

ببقي صعب

ببقي مش طايق في روحي
واحدي بتلم في جروحي
وانتي لو زعلانه روحي
ايه هيحصل
أصل قبلك
كان في واحده غرامها ليا
كله كدب

فتلاقيني ببقي قاسي
أو ساعات
ببقي صعب
==============
دي الحقيقه
أن لسه بخاف احبك

قلبي مااطمنش ليكي

ماللي شوفته قبل منك

خلي قلبي يشك فيكي

من كلامك من غيابك
من دموع باينه بعينيكي

أصل هي كمان بتشبه
كل نظره من عينيكي

أيوه خايف جرحها
يتولد تاني بإيديكي

يمكن انتي ماليكي ذنب
بس صعب

لما بزعل
كل دا يفكرني بيها
إني كنت رخيص عليها

وان انا كنت السبب
إن أنا اللي وثقت فيها

كله كدب
كل واحده وكل بنت وكل ست
كله كدب

كل واحده كتير بتحلف إنها تعرف
تحب
كله كدب

يبقي ليه مستغرباني
إن لما بجد بزعل

ببقي صعب
بنسا إني
عندي قلب
=============
مش مهم
كل جرح فــ قلبي منها
مش مهم

ماانا نفسي كنت ليها
مش مهم

عارفتني
معني حد يحب واحده
تبقي جاحده

علمتني
إني سري يكون بقلبي
ومتأمنش لأي واحده

وانتي فاهمه كل حاجه
أصلي مااتعلمت حاجه

إني أغدر أو اخون
بس انا اللي كتير بهون

زعلتني موتتني ضيعتني
حملتني كل ذنب

إني طيب إني عاشق
قلبي متعلمش حب
فتلاقيني
غصب عني
ببقي صعب

بنسا إني عندي قلب

يبقي ليه زعلانه مني
وانتي عارفه إن طبعي
أيوه صعب
=============
أحمد طلبه