حلمنا المرّ
--------
بقلمي - عادل عبد الرازق
-----------------------
يا حلم يا مودّع مدينتنا
لمين حتفوتنا
ضلمة المفارق
عتمة البيوت
على كل باب
عنوان كدّاب
وغيوم وسراب
متوّهنا في غربتنا
يا حلم يا مودّع مدينتنا
لمين حتفوتنا
...
خلاص عرفنا ذنبنا
مش حنحلم بحبنا
مش راح تشوف الضحكة عالشفايف
مش راح تسمع إلا صوتنا اللي خايف
ولا حتلاقينا مرسومين
مرّة تانية ضحكتين
حتلاقينا دمعتين ورعشة ومخاوف
يا حلم سامحنا
وانسى حكايتنا
يا حلم يا مودّع مدينتنا
لمين حتفوتنا
...
إحنا بنرفض شمسنا
وبننتحر جوّه نفسنا
وبندبح حناجر همسنا
ولا بنحلم بلون بكره
ولا بنحنّ لأمسنا
يا حلم زيّ مانت عايز كون
كدبة أو دمعة أو جنون
أو سكّة تنادينا
يا حلمنا المرّ لطريق موتنا
يا حلم يا مودّع مدينتنا
لمين حتفوتنا
طعم المرّ عشقته الشفايف
وانا وانت في الريح والعواصف
بندوّر يا حلم على بيتنا
يا حلم يا مودّع مدينتنا
لمين حتفوتنا
***
ليست هناك تعليقات:
إرسال تعليق