أنا المصري
ومين أدي
رويت الدنيا دي بعلمي
وغذِّيتها حصاد فني
أنا المصري
أنا الفرحة. أنا البسمة
أنا الطيبة .أنا الغنوة
أنا التوتة.أنا الضلة
أنا المحرات والساقية
أنا شجرة نخيل طلة
في حضن الوادي والدلتا
ترابي أصله من الحنة
وعندي نهر من الجنة
بيرويني. ويروي كمان مواويلي
ويسقي زرعنا الأخضر
ويطرح شهد ومكرر
في بعدي عنه بتأثر
وأكتب له دواويني
وأقولها وأعيدها من تاني
أنا المصري ....
أنا القلعة .أنا الفرسان
أنا الأبطال. أنا الشجعان
أنا جدي صلاح الدين
أنا التاريخ..أنا الأهرام
أنا مينا..أنا أحمس
أنا المعبد أنا المتحف
أنا خوفو. أنا خفرع
أنا خالتي نفرتيتي
أنا الراية اللي مرفوعة
ولا أرضَى في حياتي الذل
أنا الكلمة اللي مسموعة
وعليها ألف عين بتطل
أنا العالِم...أنا الفنان
أنا الجندي..أنا القبطان
أنا الطيار. أنا الإنسان
وطول عمري وأنا رضيان
مفيش مني في أي مكان
أنا المصري
*****************
بقلمي أمل صلاح
ليست هناك تعليقات:
إرسال تعليق