بحبك
الأوله بلدى
والتانيه بلدى
والتالته بلدى
الأوله بلدى وهيّ للبلاد الأم
والتانيه بلدى وخيرها ع البلاد بيعم
والتالته بلدى محتاجه بها نهتم
الأوله بلدى وهيّ للبلاد الأم ولها نسبى
والتانيه بلدى وخيرها ع البلاد بيعم وساكنه قلبى
والتالته بلدى محتاجه بها نهتم وانا عجبى
أنا العاشق حواريكى
أنا العابد لباريكى
بحبك حب مش عادى
من اول صرخه فى ميلادى
لحد ما اموت أنا فيكى
بحبك قاعده ع الرمله
صبيّه للقلل تملا
وتتهادى على نيلك
بصوت كروان تغنيلك
بحبك حب بالجمله
كدا كلك على بعضك
ربيع أو صيف ويوم رعدك
ووحى بيلهم الشعرا
خناقه بتبقى مستعره
وتقلب حب بيساعدك
بحبك سهره شعراوى
وترتيل ابن منشاوى
ومولد ستنا العدرا
ونيل يروينا بالقدره
وندوه ف ساقية الصاوى
بحبك ...بحبك ...بحبك
يامصر
أحمد عبد الوهاب ( ابن بيرم )
رئيس نادى أدب القلج ...قليوبيه
فى ٢\١٠\٢٠١٧ التاسعه والنصف ص
ليست هناك تعليقات:
إرسال تعليق