هو احنا ماتعبناش عزا
وكل يوم ناصبين صوان
دايرين نلف على البيوت
ونعزّي حد من الجيران
ونودع الزهر البديع
اللي اتغدر قبل الأوان
تعبنا من لون العلم
ملفوف على جثث الشباب
يا أيها الشيخ الكذوب
اللي مافارق مقعدو
ماحناش عدو
علشان تحلل دمنا
فتواك بتقتلنا هنا
ولا عندنا صايل
بفتواك ندفعه
ولا احتلال بنطلّعه
فارحل بقى
وخد معاك فتواك
وحبة التعابين
الرحمه يا مولانا دين
انا مش هاقولك
اننا عايشين تمام
قادرين نكفِّي
البيت غموس
م الفجر نصحى
نشتغل لمّا ننام
كما الجاموس
مربوط ف ساقيه يلفّ
والعيون فوقها غمام
لكن يا مولانا حرام
نقتل ف بعض بفتْوِتك
وزي ما حللت دم الغلبانين
فتواك هاتيجي تموتك
مستر عادل أبوزيد
ليست هناك تعليقات:
إرسال تعليق