‘‘‘‘لسة م العاشقين‘‘‘‘‘‘
مدي إيديكي للإيدين العطشانين
طلي بعينيكي عالعيون المشتاقين
تاه الزمن بينا وقلنا خلاص نسينا
أتارينا زي ما احنا لسة م العاشقين
‘‘‘‘‘‘‘
علي ورقة شجر كتبنا حكايتنا
وقعت ورقة الشجر لما بعدنا
وف صدفة إتقابلنا وتاني عدنا
نعيد اللي كان وكنا فيه عايشين
‘‘‘‘‘‘‘‘‘
ماتسأليش مفيش وقت للعتاب
مين السبب ومين فارق وغاب
كفاية علينا سنين فراق وعذاب
تعالي نعيش اللي باقي م السنين
‘‘‘‘‘‘‘‘‘‘
لسة قلبي عايش سنين عشقك
وسنين عمري لسة عايشة حبك
حتي الليالي لسه عايشة سهرك
ياكاس الهوي أنا وقلبي عطشانين
‘‘‘‘‘‘‘‘‘‘
من نظرة عينين ابتدينا الحب
بلمسة إيدين راح ليكي القلب
وبين إيديكي عرفت إزاي أحب
ونسيت الحزن سكته دي منين
‘‘‘‘‘‘‘‘‘‘‘
ياغنوتي لما كنت مصاحب القمر
ياسكتي ف كل طريق فيه سفر
يانسمة صيفي وفرحتي بالمطر
ياليل الحب اللي ما يعرف أنين
‘‘‘‘‘‘‘‘‘‘‘
يمكن أكون علي قلبك قسيت
بس أنا بقلبي ليكي تاني جيت
جاي أقول غيرك انتي ما حبيت
ياحب العمر ياسكن القلب والعين
‘‘‘‘‘‘‘‘‘‘‘
أيمن بلال
ليست هناك تعليقات:
إرسال تعليق