شعاع النور ليه مضايق،؟
بقلم الشاعر / أحمد شاهين
وكل شويه يتخانق
كما المخرج على المسرح
وكل شويه بيهدد بإنه
يغيب
وانه حيمشى ويروح
شعاع النور
دانا مكسور
وعمرى قضيته ف الضلمه
وكان بينى وبينك سور
وكان محتاج كتير همه
وانا عاجز عن التعريف
ما انا مواطن ومصرى
شريف
ما بملكش غير الهدمه
شعاع النور وليه أسى؟
عشان عالى وف القمه
ف رافض حتى تنزلى
ببسمه جميله وبكلمه
تعالى أنا وانت نتصالح
راح أرفع لك أهو العمه
وحسسنى بدفا قربك
دا والله انا بحبك
وإنت الغالى والنعمه
شعاع النور
ليه دايمأ عندهم رايح
وفايتنى
ما انا فى الطل أدامك
وما فى حد بيتنى
وليه دايما تخوش قصور
وبتفوتنى
شعاع النور
فى قلبى ضﻻم بيكفينى
سنين وسنين
وليه دايمأ مخلينى
تملى حزين
كفايا القوت بتاع يومى
دنا غرقان وف همومى
دانا مسكين
شعاع النور
أيه كلمة سرك التايهه
وانا اقولها
وأعيدها كتير وارددها
ولو كانت بعيده عنى
هسافر اجيبها من إيدها
عشان ترضى
دا ياما
ناس
كتير مرضى
وعاوزينك
شعاع النور
أنا أسف لو انت زعلت
منى فى يوم
هبوس ايديك وابوس
رجلك وهشبع لوم
بس تعالى من فضلك
دانا محروم
شعاع النور انا بردان
مفيش بطاطين
وﻻ فى امان
ومش ﻻقى غير الحرمان
فى كل مكان
شعاع النور
انا أسف لإزعاجك
لكنى بجد محتاجك
ياريت تيجى تحول
كل ضلمه لنور
شعاع النور
كلمات / أحمد شاهين
4 / 1 / 2016
ليست هناك تعليقات:
إرسال تعليق