ثورة يناير فى لوحات
ااااااااااااااااااااااااااااااا
بقلم الشاعر احمد جلال
مقدمة
عن الثورة .. وعن الاحلام .. هنتكلم
هناخد درس م الماضى .. وهنتعلم .
قالولى اكتب عن الثورة
وخلّد ذكر شهداءنا
وهاتلنا صورة من بكرة
تطمننا على تاريخنا .
قالولى اكتب عن الثورة
وفرح قلبنا .. ومتع
فى ناس ماتت عشان نحيا
ولا نسلم ولا نخضع .
قالولى اكتب عن الثورة
وحدد وصفها وعدد
لاقيت القلب م الحسرة
بيبكى فى صدرى ويعدد
قالولى اكتب عن الثورة ..
خلاص هكتب عن الثورة
ـــــــــــــــــــــــــ
اللوحة الاولى . من فيس بوك.
ـــــــــــــــــــــــــ
لازم تغور ..
زرعك خراب .. والارض بور .
عهدك ضلام .. ومافيهش نور .
اصبحنا غربا فى ارضنا
احياء .. وعايشين فى القبور .
لازم تغور
تلاتين سنة ..مستحملين ..
شاربين مرار .. واكلين انين .
سافين تراب .. نايمين ف طين .
متصبرين بالوهم ..
والامل الضنين .
وانتو هناك مستمتعين .
فى اى دين ؟؟
جزمكو ماتشوف التراب .
وكلابكو واقفين بالكلاب .
وان جه فقير يطلب طلب ..
يلقى حرس .. على كل باب .
وان حب يعمل عنترة ..
بيعرفوه معنى العذاب .
وسيادته نايم ف العسل .
وبلدنا بتموت ف الكسل .
وان حب يعرف امرنا
او ايه بيحصل او حصل ..
بيضللوه .. ويغيبوه ..
ويتوهوه .. لو يوم سأل .
اصبحنا عبرة .. ومعيرة ..
مصر .. اللى كانت مفخرة ..
صبحت ورا ..
ووقفنا فى آخر الطابور ..
علشان كدة .. لازم تغور .
ـــــــــــــــــــــــــــ
اللوحة الثانية الميدان
ــــــــــــــــــــــــــ
بشر .. من كل حتة كتير.
شباب وكبار .. غنى وفقير .
طلبهم ايه ؟؟ عدالة وخير ..
ايادى الظلم تتحاكم ..
تتقطع .. بدون تأخير .
حكومة حكيمة .. تصلحنا ..
تساعدنا على التغيير .
حكومة بجد مش منظر ..
ضمير صاحى .. لكل وزير .
وامن يخاف على ولادنا ..
ويحرسنا .. بكل ضمير .
ومش عايزين بيان منكم ..
ولا تفسير .
دى مش خطة .. ولا مؤامرة ..
دا شعب عظيم .. ودى ثورة .
ــــــــــــــــــــــــــ
اللوحة الثالثة ...الداخلية
ــــــــــــــــــــــــ
سيبوا الدنيا تعيش فى امان .
زى ما كانت ماشية زمان .
عيش وخلو الخلق تعيش ..
متخلوش انيابنا .. تبان .
كل الناس ترجع لبيوتها ..
او نطاردتكو فى كل ميدان .
عندنا امر .. اننا ننصحكو ..
بعدها نضرب ف المليان .
ــــــــــــــــــــــــ
اللوحة الرابعة ...رسالة
ــــــــــــــــــــــــ
مش هنسيب ارض التحرير
غير لما نشوف التغيير .
لم كلابك ياللا فارقنا ..
خد طيارتك ياللا وطير .
لازم ترحل .. لازم تمشى
وللا الابعد مايفهمشى .
ـــــــــــــــــــــــــــــ
اللوحة الخامسة ... الرد
ــــــــــــــــــــــــــــ
نيران مفتوحة ماتخلى ..
ومية ع اللى بيصلى
وقناصة على العمارات .
رصاص يحصد فى اولادنا
ونار تاكل فى اجسادنا
وشعبنا كله فى مظاهرات .
مافيش رجعة ولا مفاوضة
دا بيقول : حكمى .. يالفوضى .
خلاص مبقاش يا خلق سكات .
خلاص قررنا نتحرر
ولا نسوّف ولا نأخر
زمان الصمت .. عدى وفات
ـــــــــــــــــــــ
اللوحة السادسة
مبارك 28 يناير
ـــــــــــــــــــــــــــــ
بيان للشعب والامة
عشان ماتزول بقا الغمة .
انا .. مش ناوى اترشح ..
ولا ابنى .
وهافضل احكم الدولة ..
عشان ابنى .
عبرت زمان .. وعديتكو .
وعاديتونى .. ما عاديتكو .
سيبونى بس ع الكرسى
كمان كام شهر .
انا عايز اعيش بينكم
لاخر العمر .
أنا اصلا نظيف كفى ..
وكرشى ملان .. ومستكفى .
فساد ايه بس يا اسيادنا ..
انا هقضى عليه خالص .
وعايز بس اقوم بكرة ..
وفيلم الثورة دا خالص .
وبعد ما ترجعو بيوتكو
هنتفاهم .. ونتخالص .
ـــــــــــــــــــــــــــ
اللوحة السابعة
احد الاعلاميين
ـــــــــــــــــــــــــ
مكنتش طلعة طلعتها ..
والنصر ده هبة الاله .
روحنا معاك طلعتها ..
والفقر واصل منتهاه .
ارحل بقا ..
الكيل طفح
عمرك خلاص فى ارزله ..
اصبحت اشبه بالشبح .
لميت كلابك والضباع ..
الكل خان والكل باع ..
والشعب بينكم تاه وضاع ..
اللى انجرح .. واللى اندبح
ارحل بقا ... الكيل طفح .
ـــــــــــــــــــــــــــــ
اللوحة الثامنة 11فبراير
ــــــــــــــــــــــــــــــ
رئيسكم قال : انا همشى
هسيبهالكم وهتنازل .
وبعد مااسيبلكو الكرسى
هتبقو بعدى فى النازل .
ناويت انى مكملشى
وقاعد بينكو مش راحل .
وعسكركم .. هيحكمكم ..
وكل تاريخ وله مراحل .
هيظلمنى .. هينصفنى
اناراضى .
يقول فاسد .. يقول طاغية
هقول عادى .
انا اديت خلاص واجبى ..
وظلم الناس ده مش ذنبى .
ـــــــــــــــــــــــــــ
اللوحة التاسعة
( احد المصريين فى التليفزيون)
ـــــــــــــــــــــــــــ
بقت فوضى ... صنعناها
وثورتنا اللى صانتنا
عملناها .. وبعناها
تاريخنا بايه هيذكرنا ..
واولادنا .. واحفادنا ..
على ايه بكرة .. تشكرنا .
زمان كانت حضارتنا
فى كل الدنيا مذكورة
نسينا ماضينا وبقينا
فراعنة .. بس فى الكورة .
بعدنا كتير ..
عن الناس اللى كانت ياما ..
بتقلد فى اجدادنا .
وحتى الثورة ..
كانت ثورة تتدرس ..
وبعناها .. وخناها ..
وسبنا الخيبة لولادنا .
بقت فوضى ..
عايز تبقى بلا مبدأ ..
تقول الكذبة .. وتصدق
تسوق هبلك .. على اهلك
ولو قالو عبيط ارعن .
تعالى مصر
عايز تنهب فى مال الناس .
وتنسى الرحمة والاحساس .
تشوف واحد فقير غلبان
تهزق فيه وتتفرعن ..
تعالى مصر
ــــــــــــــــــــــــــ
اللوحة العاشرة
(شاب بميدان التحرير )
ـــــــــــــــــــــــــ
انا اسف على كل اللى ضيعته
ومعرفتش احافظلك
يا بلدى عليه .
انا اسف على حلمى
اللى انا بعته
سمحت لناس تساومنى
وتلعب بيه .
وسامحينى .. على بكرة
اللى تاه منى
على الثورة اللى قتلوها..
وتهمّنى .
وسامحينى
على الحلم اللى لسة مجاش .
وسامحينى
على الفرح اللى مستناس.
وسامحينى
على الحسرة اللى عشتيها
وسامحينى
على دمى اللى راح ببلاش .
احمد جلال
الف شكر للاخت شويكار
ردحذف