...إسمحيلى ب الرجوع....
بعترفلك
انى كنت معاكى قاسى
وانى سبتك لما كنتى محتجالى
وانى دايما كنت شايلك من دماغى
وانك اتعذبتى كتير بسببى
لما كنتى شايله همى من سكات
انى قطعت حبل الوداد
اللى كان عهد ما بينا
اللى خدناه ف أول معاد
وانى ياما خذلت قلبك
وانى اصريت ع البعاد
ايوه ده اعتراف بالحقيقه
انى هجرتك بالسنين
وانى مفكرتش دقيقه
ف ذكرياتنا والحنين
وانى سبت الحزن يرسم
ع الملامح والجبين
قسوه وجراح صرخة انين
بعتذرلك
عن كل جرح سببتهولك
وعن حياتك اللى ضاعت ف الانتظار
وعن كل ايام المرار
اللى كنت بسقيهالك
اللى كان ف بالك
انه حب او غرام
وعن مشاعر ..كانت مجرد كلام
ياريت تقبلى بالاعتذار
عارف إنها سذاجه
حتى لو مش مسامحه ..قولى
إكدبى وقولى سامحتك
أو حتى قولى أى حاجه
لجل ما يرتاح الضمير
قولى انشالله حتى كلمه
قلبى بيتعذب كتير
اعترفت واعتذرت
واللى فاضل يبقى منك
تقبلى رجوعى ..وتنسي
عشمان ف قلبك الكبير
تسمحيلي ب الرجوع
وتسامحينى لأنى ..بحبك
#أبوعبدالله
ليست هناك تعليقات:
إرسال تعليق