كده كتير بقلم /سيد صادق

كده كتير ...

لما الدمع يحني الضهر ..

و يبان فينا شكل القهر ..

لما يعدي علينا الشهر ..

من غير خير ...

يبقي كتير 

لما حياتنا تبقي كئيبه ..

لما تروح من بينا الطيبه ..

و لما الحلم بيطلع خيبه ...

بدون تفسير ... 

يبقي كتير 

لما بكره بيشبع موت ..

و العيشه بتتعاش بشروط ..

لما نقضي حياتنا سكوت ...

خوف م الدبابير ..

يبقي كتير

لما امبارح يتعاد تاني ..

لما اليوم بيفوت ف ثواني ..

لما دموعي تكون سبقاني ..

ف المشاوير 

يبقي كتير 

لما جراحنا بتزيد جرح

وتنسي حياتنا شكل الفرح 

لما نموت من كتر الشرح ..

و في تقصير 

يبقي كتير

لما وجعنا بناكل منه ..

لما الصبر بنشرب منه ..

لما العمر يخسر سنه ..

ف الفوازير

يبقي كتير 

لما عشانا بيكمل نوم ..

لما نصوم مش وقت الصوم ..

لما يعشش فوقنا البوم ..

و تقولوا خير !!!!

يبقي كتير

سيد صادق