الربيع العربي
إنهيار وخراب ديار
وليل طويل مالوش نهار
ربيع بينخر في العروبة
وشرخ غائر في الجدار
والرطوبة في كل طوبة
والعطوبة في الجوار
والملح دايب في العذوبة
والخريف داس الخضار
ياربيعنا إهدى حبة
ريح الغرب جاية هبّة
وأصحاب عجل له خوار
خلف تبة بتستخبى
بص أبعد م البعيد
بص ع اليمن السعيد
وسوريا والعراق وليبيا
في كل شبر نار تقيد
وصرخة شارخة في الصدور
لمصرنا بدر البدور
عشان ولادها بجهل وقفوا
شوكة ف سقف حلق زور
ياربيع بلاش نضيع
ليه بتخلط الأمور
الوليد لساه رضيع
والبدن فيه الضمور
ياربيع خليك حكيم
الدخيل إبن اللئيم
بيشيع نار الفتنة فينا
نار بترعى في الهشيم
قصدي أقولك إصحى فوء
بص تحت وبص فوق
الربيع معناه خضار
وفجر شايل الشروق
ولما يطلع النهار
والنهار دايما جهار
نوره يكشف الغموض
المستخبي ورا الستار
بقلم طارق السيد
ليست هناك تعليقات:
إرسال تعليق