(أنا مش ملاك )
أنا مش ملاك
ولا حد نازل م السما
ولا حد ماشى بشنطتين
فيهم هدايا وأوسمة
أنا كام إجابة مبهمة
أستيكة جوه المقلمة
بامسح هموم المهمومين
وهموم فى قلبى معلمة
بادعى فى صلاتى وأقول آمين
لكل القلوب المسلمة
أنا حد فيه مليون سمة
معظم سماته بتتحكى
عن واد جدع حامى الحمى
والباقى منه بتشتكى
وقت الزعل فيه كام سمة
يزعل بسرعة وباختصار
زى الحطب لو مسه نار
عصبى ودماغه مسلمة
ضحكة خدوده معلمة
لو حتى شايل مية هموم
تلقى الوشوش متبسمة
انا مش ملاك
جاى م السما
ولا حد مليان أوسمة
أنا شوفت نفسى كام سؤال
اجابتهم طلعت مبهمة
ليست هناك تعليقات:
إرسال تعليق