ضلمة ونور
تعبان أوي من دنيتي ديّا
صعبان أوي أوي حالي عليا
أنا إللي كنت عزيز الأهل
وكانت الدنيا دي ملك إديّا
إتذليت من بعد العز
مافيش غير بس ديابة حواليّا
ليه الدنيا دي مابترحمش
وليه يحلالها تعذّب فيّا
وطبع الناس بقى ردي كده ليه
ليه الغلبان ييجوا عليه
فين الرحمة فين الحنيّة
فينك يامّا تحني عليّا
محتاج يامّا أكنّ في حضنك
أو أتكوّم يامّا في حِجرك
وتطبطبي على ضهري شويّة
زي زمان وتهزّي في رجلك
علشان أنام بامّايا شويّة
نفسي أشوفك أو أشوف طيفك
محتاج يامّا نصيحتك ليّا
وفجأة ظهرلي في لحظة الطيف
جه في صورة أمي يرد عليّا
جاني إدّاني درع وسيف
وبصوت قاسي فيه الحنيّة
قاللي إن أنا في الدنيا دي ضيف
قاللي كلام أثّر أوي فيّا
أُصلب عودك وإمسح دمعك
وإياك أشوفك تاني مكسور
في عز الضلمة تولع شمعك
وأصبر حبّة يجيك النور
وإدعي لربك ربك سامعك
يسدل ستره ستاير نور
وإحمد ربك علشان جعلك
عِشت الدنيا في ضلمة ونور
بقلم طارق السيد
فسحة في فصحي
أنا حر وهفضل حر
في الجو وبحر وبر
أنا بكتب زي ما بكتب
وآهي تطلع زي ما تطلع
عامية ولا عمودي
أو حتي الشعر الحر
ناوي أنا اطلع فسحة
وأغطسلي كدا كام غطسه
في بحر التام أو وافر
أو حتى في بحر سنافر
هفضل أعوم وأعافر
وأرجع بتناص ع البر
أنا حر وبكتب حر
بالفصحي أكتب في سطور
في قصيدة ضلمة ونور
من غير ما ألف وأدور
دي بس مجرد فسحة
بيتفسحها الحر
في الآخر هاخد علقة
بإدين شعراء الفصحي
لكن علي مين يا أساتذة
أنا أستاذ فن الفر
قصيدٌ درٌ أبكاني
بغير زي قصد أشقاني
تجود المقلٌ بأدمعها
من سهم حنين أدماني
وسعيرٌ باتت جذوته
تلهبٌ قلبي الولهان
أه من قلب ملتهب
من ذكرى وذكراي الذهب
كم يهفوا القلب إلى أم
أشبه بالملك النوراني
لها في الجنةِ منزلة ٌ
بإذن الله المنان
في ختام قصيدي أتأسف
سامحني يا عم الذبياني
بقلم طارق السيد
ليست هناك تعليقات:
إرسال تعليق