ما تسألنيش يا حلم
----------------
بقلمي ـ عادل عبد الرازق
-----------------------
من صغر سننا
وبنرسم في الكون
أحلام لا بتتحقق
.. ولا بتكون
تكدب
تهرب
تخون
المفارق والدروب
الملامح والقلوب
والحقايق والغروب
والليالي والقمرات
من صغرنا والخطوة ويّانا متحيّرة
وسط السراب مشاويرنا متبعترة
وبكره تايه في سكّة متشجّرة
ببرد الريح والظنون
وبتعاني خطوتنا
في سكة ما عرفتنا
وطريق ما يقبلنا
لا بصرخة ولا بسكات
وإمتى يا حلم في الروح مجروح
وبتترسم جوّه الجروح جروح
وبتتمحي في لحظة ميلادك
بين الشفايف والعيون
وليه يا حلم لا بتتحقق
... ولا بتكون
يا طفل يا صغيّر
يا تايه ومتحيّر
ما تسألنيش يا حلم
ما املكش إجابات
*****
ليست هناك تعليقات:
إرسال تعليق