أهل الثقافة
الفكر نور الحياة
والفن لها فيتامين
يا أهل الثقافة والفن اسمعونا
اعتصامكم كان للثورة أيقونة
أعمالكوا سبتوها
وبيتكوا فوتوها
يونيو ويوليو كمان مسيرات طلعتوها
ايدكم بايد الشعب والغمة زحتوها
وأدي الشبابيك للنور فتحتوها
فجر الحرية أهو لاح
والشمس طلعت تغني حي علي الفلاح
دقت ساعة العمل لينا
يا لي بتحبوا مصر وعاشقنها
قوموا ويلا ابدعوا
والناس صحصحوها من نومها
ده الفكر نور الحياة
والفن لها فيتامين
قطر الثقافة اللي تاه ردوه علي القضيبين
يمشي في ربوع البلد مشكاه
تنور عقول ملايين
من شرق مصر لغربها
من شمالها لجنوبها
فن وموسيقي وأدب
تملى سما دروبها
عايزين ننمي البلد ونثقف الملايين
نغلب ضلام الجهل بالتنوير
نشيل غشاوة معششة
دامت سنين وسنين
لما الودان يابا أتلوثت
ومناظر كتير أذت العنين
وضماير اتباعت عند النخاسين
بين السندان والمطرقة
كنا في الزمن اللفات محشورين
كماشة كانوا علينا بيها مسيطرين
حكومة فاسدة كانت علينا بتدوس
وشوارعنا كانت مرتع للمتأسلمين
واحنا ياولداه بين دول ودول
انبح صوتنا لجل من زيح الكابوس
يا أهل الثقافة والفن اسمعونا
يالي اعتصامكم كان للثورة أيقونة
يالا نشيل عن وش بلدنا كل تكشيرة
تضحك تهلل وتعود الفرحة للياليها
دور الثقافة زيدوها ولولدنا افتحوا أبوابها
احيوا المسارح سمعوا الناس دقة خشبتها
طوروا السينمات ونوروا بالفن شاشتها
رقوا الدراما لجل ما تفتح عقول بحكمتها
مصر العظيمة مستنياكم بلهفة وشوق
تصرخ تنادي عليكم في عز كبوتها
يالا يا أهل الفكر نعيد مجد راياتها
نعيد لها تاني في الكون ريادتها
دة الفكر نور الحياة
والفن لها فيتامين
صلاح منير
ليست هناك تعليقات:
إرسال تعليق