**يالگمـْرة دُورِي دُورِي ***بقلمي عبد الحق توفيق البقالي****

**يالگمـْرة دُورِي دُورِي وْديـرِي دارة ...وْزيرْتْــنـا وردة ونــوّارة **
------------------------------------------------------------------------------------------------

تدور صور ومظاهر هذا النص، حول نازلة وواقعة "الرّبعـُمـْيا" العشرون درهماً....التي سارت بها الرّكبان، وتظاهر بها الفرسان...... حلاًّ سحرياً مداوياً للفقر والهموم والأحزان ...زكاةً وطهراً لما نكنزه من فوسفاط وذهب ولؤلؤ وسمك ومرجان..... وقد يحدث تشابه في الأسماء أو في العناوين والصفات..... نسأل المولى لنا ولكم النجاة من الشرور والآفات.... فتلكم التصادفات من محض الخيال أو بعض من الهُبال.... فاللهم اغنِنا بربعمْيا عن كلّ عوز وسؤال... واصرف عنا ربنا سوء الاحوال.... واجعل بلدنا المرتع للغِنى والرّفه وسَعة المجال... قراءة ممتعة..... ولي عجبو "دَيـًِّي"يبــارطــاجــيـًهْ.......وشكراً

*********************************************************

هَاسَّماوِي هَالْحقَّاوِي هازْمانْ الْبهْتانْ ولبْلاَوِي
هالْفسْفاطْ هاالذّهبْ هاسبعْ بْحُورْ هابْخُورْ جّاوِي
هَلكْلامْ جّْديدْ هاكْسكْسُو بلْگدِّيدْ منغّمْ مْتاوِي آوِي
غضّْ لْبَصَرْ ورْضَ بِمَا حَضَرْ ولاَتْعاودْ خَبَرْ العطّاوِي
عشْرينْ درهمْ سِحْرِيّة ديرْ النّيّة تْباتْ ناشطْ مْداوِي
ربْعمْيَا غلْباتْ الأورو هَاَ بـُوجُورْ لـيكْ مدام الحقّاوي
جوجْ شقْفاتْ صفْراتْ تْعِيشْ نهاركْ مفيّكْ يازَّاوِي
عشرين درهمْ مصروفْ الدّراري ولهْرارِي أهْياوِي
عيّشْ لوْلادْ وْحاربْ الزّلْطْ وحجّْ مكّة يا السّعْداوِي
الدرهم عامْ وتشلّلْ بالذّهبْ وْصَارْ غَالي وْساوِي
الدّرْهم عامْ وتحمْـحَمْ والأورو طاحْ وْصَارْ هاوِي
بْراڤوُ ليكْ بـِيبَا لِيلاَكْ الشّريفة مُولاتي الحقّاوي
عشرين درهم كافْياكْْ سكّتْنَا شْعَيْبة ملّـكْلامْ الْخاوِي
كْرا وْمَا وْضَوّ وكسْوة وصْباطة ودْوَا گالْ الرّاوِي
كولْ شْربْ وتبرّعْ وتْسَارا ومْرضْ راهْ مرْضكْ مْداوي
بْغيتلكْ الرّضى ولحلْوَا مگرّضَايابتـِّي ياسنيُورة الحقّاوِي
عشْرينْ درْهمْ الرّخا للّه سكّتونا باراكا منْ التّناوي
الحكْمة فلْبَرَكة والعلـّة فلبـرّاكة غيرْ زِيدْ الْخـَاوِي
هالسّماوِي هاالحقّاوِي هازرْوالة تجْرحْ وتْداوِي
بايْبايْ الزّلطْ طحنّاكْ بربْعمْيَا طحنّاكْ بكْلامْ مْتَاوِي
حگرة كِحگرة شهيد كومِيرة لّي خلاّها لوْزيرْ الشّاوِي
هزّراسك ياالمعطي عشرين درهم تْگادّ عنْقكْ اللاّوِي
ثمّرْ مايخصّكْ خيرْ زيدْ صْبرْ وسْكتْ وكون راجلْ عقْلاَوِي

***بقلمي عبد الحق توفيق البقالي****