هحكي عن بلدى
بقلم الشاعر / عزت عبدالسلام
بلدى الى فيها الخير يكفى كل ولادها
بلدى الى طول عمرها كبيرة اخواتها
بلدى الى ياما كتير حسدوها حسادها
ولاعمر يوم اتحنت ولا حد يوم سادها
فيها الادب منهج والكرم طبع عيالها
دى بلدى زى الفرس وولدها خيالها
ولا عمرهاغدرت ولا ردت حبيب جالها
دى بلدى ام الشهيد مات عشان طارها
دلوقتى حيلها اتهد وبان عليها الهم
شوية كلاب فيها بيمصو حتى الدم
تعب الفقير فيها وحياتو فيها بغم
والى بيسرق فيها الكل قالو ياعم
قلبى عليها اتوجع من كتر اوجاعها
بتصرخ باعلى صوت ولا حد يسمعها
تيجى تقوم وتفوق الخونه تمنعها
بيحاربو كل شريف ويقولو دا باعها
وهى رافعه ايديها بتدعى ايوة عليهم
جواها اه فى قلبها مبقاش مكان ليهم
دى قلبها طاهر مش حمل اه بلاويهم
وفيها دول خربو وسرقوها اه بايديهم
بلدى دى تبقى مصر ام الهرم والنيل
بلد التاريخ الحضارة بلد نجيب وزويل
بلدى الى ياما غنو فى اسمها مواويل
بلدى الى فى القران وبلدى فى الإنجيل
عليها قلبى اتفطر والدمع منى سال
حبيبتى بيسرقوها شوية كلاب اندال
نسيو خيرها عليهم من يوم مكانو عيال
بس الى خان بلدو مش يبقى ابن حلال
علشان يفوز بالمال يعض ايد امو
هو مين فى الكون غيرها يشيل همو
على ارضها اتولد وحضنها ضمو
وبعد اه ما يموت مين غيرها هايلمو
لو هحكى عن بلدى محتاج لالف كتاب
الله يعين ناسها دول طيبين احباب
دا الخير بيجرى فيهم والطبع اه غلاب
يارب انت القوى احميها يا وهااااااب
اشعار
عزت عبد السلام
ليست هناك تعليقات:
إرسال تعليق