هاشتاج إسمك
وعن الاحلام
وعن العمر اللى بيضيع فى تحقيقها
وعن صورة فى خيالنا .. خيالنا بس اللى يعرفها
وعن أسماء بتتسمى لناس مالهاش فى حياتنا أى وجود
بنتواعد ونتقابل ونمسك ايد .. لسه هانمسكها
ويوم ورا يوم وعمر يعدى جوه العمر
ومواعيدنا بتتأجل وتفضل بس جوه الحلم
ولما ننام .. ننام علشان ورانا ميعاد
وعنها لما بتفتح عليا الباب وأنا نايم
فتدخلى جوه الحلم
يا أجمل حلم فى حياتى
إمتى الحلم يتحقق ?!
انا زى اللى حبوكِ
يا حلم كأنه متفصل لكل اللى بيحلم بيه
كأنك وِرد مكتوب بينزل كل يوم
يفتح الباب على اللايمين فى عز النوم
وكل واحد فينا بيندهلك باسم بيحبه
وبيشوفك بلبس بيناسب ظروف حلمه
و نصحى كل يوم الصبح راضيين عن جمال وصفك
مافيش غيرى قدر يحكى اللى بيشوفه
فغطى شعرك الملفوف على جبينك
هافتح علشانك قصيدة نشربها ومانقولهاش
ولو نسكر فاحتفالاً بأول يوم فى الحياة يتعاش
وبخروجك من بينى وبين نفسى
وبظهورك فى الكلام عنى
لعل الحلم يتحقق
و هاشتاج اسمك على انستا
على صورتى اللى بتضحكلك
لعله يوقعك فيا ونتقابل ..
فحلمى بس اللى يتحقق
من دون كل اللى حبوكِ
ليست هناك تعليقات:
إرسال تعليق